Umuryango w’ ubumwe bw’ ibihugu by’ u Burayi EU waburiye igihugu cya Repubulika iharanira Demukarasi ya Congo ko kizafatirwa ibihano bishya nikitubahiriza amasezerano yo ku wa 31 Ukuboza.
Inama y’ abaminisitiri b’ ububanyi n’ amahanga yateraniye I Buruxelle ku wa 6 Werurwe havugiwemo ko ibyo bihano bizaba ari ugufatira imitungo no kubuzwa gutembera mu bihugu bigize uwo muryango.
Ibyo bihano bizafatirwa abanyapolitiki n’ abashinzwe umutekano batungwa agatoki mu batuma muri Repubulika (…)

Umuryango w’ ubumwe bw’ ibihugu by’ u Burayi EU waburiye igihugu cya Repubulika iharanira Demukarasi ya Congo ko kizafatirwa ibihano bishya nikitubahiriza amasezerano yo ku wa 31 Ukuboza.

Inama y’ abaminisitiri b’ ububanyi n’ amahanga yateraniye I Buruxelle ku wa 6 Werurwe havugiwemo ko ibyo bihano bizaba ari ugufatira imitungo no kubuzwa gutembera mu bihugu bigize uwo muryango.

Ibyo bihano bizafatirwa abanyapolitiki n’ abashinzwe umutekano batungwa agatoki mu batuma muri Repubulika Iharanira Demukarasi ya Congo hakomeza kugaragara ubwicanyi n’ ukutabahizwa kw’ uburenganzira bwa muntu.

Umuryango w’ Ubumwe bw’ ibihugu by’ u Burayi wamaze gufatira ibihano abayobozi barindwi bakuru bashinzwe umutekano mu butegetsi bwa Perezida Joseph Kabila. Abo bantu uko ari barindwi ni abavugwaho kuba baragize uruhare mu bwicanyi bwambuye ubuzima abagera kuri 50 mu mujyi Kinshasa muri Nzeli 2016.

Jeunes Afriques dukesha iyi nkuru ikomeza ivuga ko uwo muryango utewe impungenge n’ ubwicanyi bukomeje gukorerwa abaturage muri icyo gihugu by’ umwihariko ubwakorewe abaturage bo mu ntara ya Kasaï n’ ububera mu gihugu hagati.

EU ihuza kuba icyo gihugu gikomeje kugaragaramo ubwicanyi no kuba abategetsi bakuru baranze kubahiriza ibikubiye mu maserano yagezweho binyuze mu biganiro Leta ya Congo yagiranye n’ abatavugarumwe n’ ubutegetsi. Ibyo biganiro byari biyobowe na Kiliziya gatolika.

Uwo muryango uvuga ko urupfu rw’ umunyapolitiki Etienne Tshisekedi wari ukomeye mu batavuga rumwe n’ ubutegetsi rwatumye icyo gihugu giterera agati mu ryinyo mu bijyanye no gushyira mu bikorwa ayo masezerano yo ku wa 31 Ukuboza 2016.

Umuryango w’ Ubumwe bw’ ibihugu by’ u Burayi wasabye D R Congo n’ abafatanyabikorwa bayo kwihutisha ishyirwa mu bikorwa ry’ ayo masezerano amatora ya Perezida akaba bitarenze umwaka wa 2017. Wanasabye kandi Dr Congo kureka ibikorwa bibangamira abatavugarumwe n’ ubutegetsi, no kurekura imfungwa za politiki