Ihuriro rya AFC/M23 na Wazalendo ishyigikiwe n’ubutegetsi bwa Repubulika Iharanira Demokarasi ya Congo biri mu mirwano ikomeye muri santere ya Nyabiondo iherereye muri teritwari ya Masisi, intara ya Kivu y’Amajyaruguru.

Santere ya Nyabiondo ni kamwe mu duce tw’ingenzi muri Masisi, kuko iri ku maremba ya Walikale. AFC/M23 yayifashe tariki ya 9 Werurwe 2025, iyambuye imitwe irimo APCLS na NDC-R.

Mu masaa saba y’ijoro ryo ku wa 19 rishyira uwa 20 Ukwakira, imitwe ya Wazalendo yagabye igitero kuri AFC/M23 muri Nyabiondo, hatangira imirwano ikomeye.

Urusaku rwinshi rw’imbunda nini n’intoya rwatumye abaturage batuye muri iyi santere bagira ubwoba, baguma mu ngo zabo.

Imitwe ya Wazalendo ifite intego yo kwisubiza iyi santere yambuwe mu mezi arindwi ashize, kugira ngo iyifashishe mu kubaka urukuta rukumira AFC/M23 mu bice byinshi bya Walikale.

Imirwano mu bice byinshi by’intara ya Kivu y’Amajyepfo ikomeje mu gihe AFC/M23 na Leta ya RDC ishyigikira Wazalendo, byemeranyije kubahiriza agahenge no gushyiraho urwego ruhuriweho rukagenzura.

Iyo atari Wazalendo igabye ibitero kuri AFC/M23, ingabo za RDC ni zo zibigaba, zigasobanura ko ziri gufunga inzira aba barwanyi bashobora kunyuramo bashaka kwagura ibirindiro.

Ku mugoroba wa tariki ya 18 Ukwakira, indege z’ingabo za RDC zarashe ku birindiro bya AFC/M23 muri Mpeti na Buhaya muri Walikale.

Umuyobozi wungirije wa AFC/M23, Bertrand Bisimwa, yamaganye iki gitero, yibutsa ko Leta ya RDC iri kurenga ku masezerano impande zombi zagiranye ubwo zari i Doha muri Qatar.