Afrika y’Epfo yareze leta ya Israel mu rukiko Mpuzamamahanga Mpanabyaha (CPI/ICC) ku bikorwa byayo mu ntambara yo muri Gaza, nk’uko byaraye bitangajwe na Perezida Cyril Ramaphosa.

Perezida Ramaphosa ati: “Nka Afrika y’Epfo, turi kumwe n’ibindi bihugu bitari bike kw’isi, twabonye bikwiye ko twarega ibikorwa byose bya leta ya Israel mu rukiko Mpuzamahanga Mpanabyaha. Twaregeye uru rukiko kubera twemera ko hari ibyaha byo mu ntambara birimo gukorwa”.

Ntavuga ibindi bihugu biri kumwe na Afrika y’Epfo byaregeye ICC ku bikorwa Bya Israel.

Avuga kandi ko batashyigikiye igitero Hamas yakoze muri Israel mbere yaho, ariko ko badashigikiye ibyo Israel ikomeje gukora, “babona ko ICC ikwiye gukora iperereza”.

ICC ikora iperereza ikongera igacira imanza abantu bashinjwa ibyaha by’agahomamunwa biraje ishinga amahanga, nk’ibyaha byo mu ntambara n’itsembabwoko.

Afrika y’Epfo ni kimwe mu bihugu bishyigikiye cyane Abanya-Palestina muri iyi ntambara ikomeje hagati yabo na Israel.

BBC