Repubulika Iharanira Demokarasi ya Congo yateguje Uganda ko umubano bifitanye ushobora kuzamba ndetse n’ibikorwa bya gisirikare ibihugu byombi bihuriyemo bigahagarara, kubera amagambo ya Gen Muhoozi Kainerugaba.

Sponsored Ad

Repubulika Iharanira Demokarasi ya Congo yateguje Uganda ko umubano bifitanye ushobora kuzamba ndetse n’ibikorwa bya gisirikare ibihugu byombi bihuriyemo bigahagarara, kubera amagambo ya Gen Muhoozi Kainerugaba.

Kinshasa yahaye Kampala uyu muburo nyuma y’ubutumwa butandukanye Gen Muhoozi usanzwe ari Umugaba Mukuru w’Ingabo za Uganda yari amaze iminsi yandika ku rubuga rwe rwa X, mbere yo gufata icyemezo cyo guhagarika kurukoresha.

Minisitiri w’Ububanyi n’Amahanga wa RDC, Thérèse Wagner Kayikwamba, ku wa Kane w’iki Cyumweru yabwiye abanyamakuru ko Uganda niramuka idatanze umucyo ku magambo ya Gen Muhoozi, RDC ihagarika umubano ifitanye na Uganda.

Yagize ati: “Twasobanuye neza ko aya magambo nakomeza ndetse ubuyobozi bwa Uganda bukaramuka budatanze ibisobanuro ku magambo Gen Muhoozi anyuza mu itumanaho rye nk’umukozi wa Guverinoma ya Uganda, natwe tugomba kwisubira ku mubano n’ubufatanye dufitanye.”

Congo Kinshasa ivuga ko yamenyesheje kenshi Uganda ko itishimira ibitangazwa na Gen Kainerugaba, ndetse ko nibiba ngombwa ibyo avuga bizagira inkurikizi.

Kinshasa ikomeje kwikoma Kampala, nyuma y’uko ku wa 16 Ukuboza Gen Muhoozi yanditse kuri X ubutumwa bwavugaga ko ateganya kugaba ibitero ku bacanshuro b’abazungu bari muri RDC.

Congo inshuro nyinshi yanakunze kwikoma uriya musirikare imushinja kubogamira ku Rwanda ndetse no ku mutwe wa M23 umaze imyaka itatu mu ntambara n’ingabo zayo.