Abatunzi batatu ba mbere ku isi bamaze kugira umutungo ubarirwa muri tiriyari imwe y’amadolari y’Amerika, bingana hafi n’agaciro k’isoko rya sosiyete ya Warren Buffett, Berkshire Hathaway.

Nk’uko imibare ya Bloomberg Billionaires Index yabyerekanye ku wa Gatanu w’icyumweru gishize, Elon Musk uyobora Tesla na SpaceX afite umutungo wa miliyari 419 z’amadolari, Larry Ellison washinze Oracle afite miliyari 349, naho Mark Zuckerberg uyobora Meta afite miliyari 265. Bose hamwe bafite miliyari 1.03 z’amadolari, bakaba barusha kure agaciro ka za kompanyi zikomeye nka JPMorgan, Walmart na Oracle.

Umutungo wabo ugizwe ahanini n’imigabane bafite mu bigo bikomeye bayoboye. Musk afite 13% ya Tesla na 42% ya SpaceX, Ellison afite 41% ya Oracle, naho Zuckerberg afite 13% ya Meta. Izamuka ry’imigabane y’ibi bigo ryatumye umutungo wabo wiyongera cyane mu gihe gito. Nubwo Musk yagabanutseho miliyari 14 muri uyu mwaka, Ellison yungutse miliyari 157 kubera izamuka rya 75% ry’imigabane ya Oracle kuva mu ntangiriro z’umwaka, naho Zuckerberg yungutse miliyari 58 kubera izamuka rya 29% ry’imigabane ya Meta muri 2025.

Si aba gusa bungutse, kuko n’abandi banyamafaranga bakomeye ku isi bongereyeho miliyari 434 ku mutungo wabo muri uyu mwaka, bituma abaherwe batunze miliyari y’idolari bose bagira hejuru ya miliyari 100 basaga miliyari 3.2, hejuru y’agaciro k’isoko rya Alphabet cyangwa Amazon.

Abashoramari bakomeje kugaragaza icyizere mu mbaraga z’ikoranabuhanga ry’ubwenge buhangano (AI) mu kongera inyungu no kugabanya ikiguzi cy’imikorere y’amakompanyi. Oracle yonyine yazamutseho 43% mu munsi umwe gusa, biyongerera agaciro kayo hafi miliyari 300 nyuma yo gutangaza ko izabona inyungu nyinshi itewe n’izamuka ry’ibikenerwa na AI.

Hari kandi amakuru y’uko Elon Musk ashobora kuba umuntu wa mbere ku isi uzagera ku mutungo wa tiriyari imwe wenyine, binyuze mu masezerano mashya ya Tesla ateganya ko azahabwa imigabane ifite agaciro ka tiriyari nibura naramuka azamuye agaciro k’isoko rya Tesla inshuro zirenga umunani mu myaka icumi iri imbere no kuzuza intego zikomeye zayo. Ku wa Gatanu ushize, Musk yaguze imigabane ya Tesla ifite agaciro ka miliyari imwe, agaragaza icyizere afite ku rugendo rwe.

Nubwo kugeza ubu abaherwe batatu ba mbere ku isi bose hamwe batunze tiliyari imwe y’amadolari, hari amahirwe y’uko mu minsi iri imbere Elon Musk yaba atunze aya mafaranga wenyine