Umuherwe w’Umunyamerika ufite inkomoko muri Afurika y’Epfo, Elon Musk, yongeye guca agahigo mu mateka y’ubukungu nyuma yo kugera ku mutungo ubarirwa muri miliyari 500$, ibintu bimushyira ku isonga nk’umuntu wa mbere ku Isi ushobora kugera kuri tiriyali y’amadolari. Uyu mugabo ukomeje kuyobora urutonde rw’abakire ku Isi, akurikiwe na Larry Ellison ariko amusiga inyuma hafi miliyari 150$.

Kuzamuka kw’imigabane ya Tesla ku kigero cya 4% byatumye Musk yinjiza miliyari 9.3$ mu munsi umwe. Ubu afite 12% by’imigabane ya kompanyi ifite agaciro ka miliyari 191$, uretse n’andi masezerano yo mu 2018 akiri mu manza ashobora kumwongerera ubutunzi.

Umutungo wa Musk kandi wiyongera cyane kubera SpaceX, kompanyi y’ingendo n’ubushakashatsi mu isanzure yashinze mu 2002, ifite agaciro ka miliyari 400$. Musk afite 42% byayo bingana na miliyari 168$. Hari kandi xAI Holdings, kompanyi y’ubwenge bw’ubukorano (AI) yahuje na X (yahoze ari Twitter) mu 2025, ifite agaciro ka miliyari 113$, Musk akagiramo 53% bingana na miliyari 60$.

Mu myaka itanu gusa ishize, ubutunzi bwa Musk bwazamutse mu buryo butigeze bubaho: mu 2020 yari afite miliyari 24$, muri Kanama uwo mwaka aba mu bantu batanu ba mbere bageze kuri miliyari 100$, muri Mutarama 2021 aba umukire wa mbere ku Isi ku nshuro ya mbere afite miliyari 190$. Muri Nzeri 2021 yarenze miliyari 200$, mu Ugushyingo agera kuri miliyari 300$, mu Ukuboza 2024 aba ageze kuri miliyari 400$, none mu Ukwakira 2025 amaze kugera ku miliyari 500$.

Nk’uko Forbes ibitangaza, abasesenguzi bavuga ko mu gihe umutungo wa Musk ukomeje gutumbagira, ashobora kuba umuntu wa mbere ku Isi ugeze kuri tiriyali y’amadolari bitarenze mu mwaka wa 2033, igihe amwe mu masezerano mashya ya Tesla azaba yatangiye kubahirizwa.

Musk ariko yagaragaje ko atibanda ku bukire gusa, ahubwo yibanda no ku bubasha bwo kugenzura kompanyi ze. Yagize ati: “Ntabwo byerekeye amafaranga, ahubwo ni ukubona ubushobozi bwo kugenzura Tesla no kurinda umutekano igihe tuzaba twubaka robots nyinshi. Ntabwo nifuza kuzajya nkurwa ku mwanya n’abantu badafite imigabane muri Tesla.”

Ku wa 1 Ukwakira 2025, umutungo wa Musk wari ugeze kuri miliyari 499.1$, uburaho gato ngo ugere kuri miliyari 500$. Uyu munsi, akomeje kuba umuherwe wa mbere ku Isi, kandi kubera ikinyuranyo yashyize hagati ye n’abamukurikira, bisa n’aho bigoye kubona vuba umuntu uzamusimbura ku ntebe y’icyubahiro amaze igihe kinini yicayeho.

Elon Musk mu nzira zo gutunga tiriyari y’amadolari