Leta y’u Burundi yategetse Abamotari ko guhera kuri uwu wa 14 Mata 2020, ipikipiki yose itwara abagenzi itegetswe kugendana akajerekani k’amazi kugira ngo umukiriya wese abanze gukaraba intoki imbere yo kurira.

Sponsored Ad

Ibi byatangajwe na Bwana Arthémon Ndayegamiye uhagarariye ishyirahamwe ry’abatwara amapikipiki mu Burundi mu kiganiro yagiranye n’abanyamakuru bo muri iki gihugu cyavugaga ku ngamba zo kwirinda no kurinda abandi icyorezo cya Coronavirus.

Uburundi bukomeje kunengwa n’imiryango mpuzamahanga kubera ukuntu bufatana uburemere buke [minenegwe]icyorezo cya Coronavirus cyahitanye umwe mu baturage babwo ku Cyumweru.

Kugeza ubu,u Burundi buracyari ku ntambwe ya mbere mu kurwanya Coronavirus mu gihe ibindi bihugu bigeze ku guhagarika gahunda zose zihuza abantu mu rwego rwo kwirinda ikwirakwira rya Coranavirus.

Kuri Pasika yabaye ku cyumweru gishize, habonetse amafoto y’abantu bakoraniye mu nsengero ari benshi bizihiza umunsi wa Pasika nta kibazo bafite.

Umuvugizi wa Minisiteri y’ubuzima mu Burundi [MSPLS] yatangaje ko kuri iki cyumweru tariki ya 12 Mata 2020,umuntu wa mbere yahitanwe na Coronavirus gusa ngo yari asanzwe afite izindi ndwara zikomeye.

Uyu muvugizi w’iyi minisiteri ya MSPLS,abinyujije kuri Twitter yayo yavuze ko uyu muntu wahitanwe na Coronavirus yari ari kuvurirwa mu cyumba cy’indembe mu bitaro bya Kira biri mu mujyi wa Bujumbura ariko ubu burwayi bwamuhitanye nyuma yo guhurirana n’izindi ndwara zikaze yari arwaye.

Ku mugoroba wo kuwa kabiri tariki 31 Werurwe 2020,nibwo Minisitiri w’Ubuzima mu Burundi, Dr Thaddée Ndikumana, yatangaje ko muri icyo gihugu ku nshuro ya mbere habonetse abantu babiri barwaye Coronavirus.

Minisitiri Ndikumana yasobanuye ko abagaragayeho icyo cyorezo ari abagabo babiri b’Abarundi b’imyaka 56 na 42 y’amavuko, bakaba ngo barinjiye mu Burundi baturutse mu bihugu byo hanze.

Ku mugoroba wo kuwa 6 Tariki ya 11 Mata 2020 nabwo, minisiteri y’ubuzima mu Burundi iheruka gutangaza abanduye Coronavirus aho yatangaje ko habonetse abantu babiri bashya bayanduye bituma w’abafite covid-19 uba abantu batanu(5).

Imiryango mpuzamahanga yita ku buzima itewe impungenge n’uburyo u Burundi butafashe ingamba zo kwirinda ikwirakwira rya Coronavirus aho imbere mu gihugu ubuzima busanzwe bukomeje.