Umubare w’abamaze kwicwa na coronavirus muri Leta Zunze Ubumwe z’Amerika wamaze kurenga 51,000, nkuko bigaragazwa n’imibare ya Kaminuza ya Johns Hopkins.

Sponsored Ad

Iki ni cyo cyorezo cya coronavirus cya mbere kibi cyane kibayeho ku isi.

Muri abo iyi virusi imaze kwica muri Amerika, abarenga 3,000 yabishe mu masaha 24 ashize. Ubu muri iki gihugu habarurwa abantu barenga 870,000 bemejwe ko banduye coronavirus.

Ariko Amerika iracyafite ikigero kiri hasi cy’abicwa n’iyi virusi ugereranyije na byinshi mu bihugu byo ku mugabane w’Uburayi ugendeye ku bamaze kubarurwa, nkuko byashimangiwe n’itsinda ryo kurwanya coronavirus ryo mu biro bya perezida w’Amerika bya White House.

Aya makuru ateye inkeke atangajwe mu gihe ibice bimwe by’Amerika byongeye gusubira mu buzima busanzwe nyuma yo kumara igihe mu bihe by’akato.

Inzu zitunganya imisatsi zimwe na zimwe zo muri leta za Georgia na Oklahoma zishobora kongera gufungura imiryango, naho leta ya Alaska yo yongeye guha impushya zo gukora za ’restaurants’.

Gusa hari ababurira ko hakiri kare cyane.

Kugeza ubu Amerika ni yo ifite umubare munini cyane ku isi w’abamaze kwicwa na Covid-19 - indwara yo mu myanya y’ubuhumekero iterwa n’ubu bwoko bushya bwa coronavirus - ndetse n’abanduye ba mbere benshi ku isi.

Ariko, Amerika ituwe n’abaturage miliyoni 330, baruta cyane abo mu bindi bihugu nka Espagne n’Ubutaliyani byibasiwe cyane na coronavirus.

Dr Deborah Birx, inzobere yo mu itsinda ryo kurwanya coronavirus ryo muri White House, yavuze ko iki gihugu gifite "rumwe mu ngero nto cyane z’abo yica ku isi yose".

Ugendeye ku mubare w’abaturage, umubare w’abishwe na coronavirus umaze gutangazwa muri Amerika uri hasi ugereranyije n’uw’abo imaze kwica muri Espagne, Ubutaliyani, Ubufaransa, Ububiligi n’Ubwongereza.

Ukwiyongera kw’umubare wa buri munsi w’abicwa na coronavirus muri Amerika, ku ruhande rumwe kandi byatewe no kongeraho impfu "bishoboka ko" zatewe na coronavirus.

Ku itariki ya 14 y’uku kwezi kwa kane, ikigo cy’Amerika cyo kurwanya indwara cyatangaje ko umubare w’iki gihugu w’abapfuye uzajya wongerwamo abemejwe ko bazize na coronavirus ndetse n’abacyekwa ko ari yo bazize.

Indi nkunga y’ingoboka

Urupfu rucyekwa ko rwatejwe na Covid-19 ni urwujuje ibimenyetso by’iyi ndwara ariko bikaba bitaremejwe n’ipimwa ryo muri ’laboratoire’.

Ni n’ingenzi ariko kuvuga ko impfu nyinshi zatewe na Covid-19 itarakara cyane ngo igaragaze ibimenyetso na n’ubu zitaratangazwa.

Rero ikigero cy’abapfuye gishingiye ku bemejwe ko ari yo bazize ntabwo gihuye n’abo yishe bose muri rusange muri iki gihugu.

Ibikorwa byo gupima ni ingenzi mu kumenya by’ukuri uko abo iyi virusi imaze kwica bangana ndetse n’uburyo ubwandu buri gukwirakwira.

Visi Perezida w’Amerika Mike Pence, ukuriye itsinda ryo muri White House ryo kurwanya coronavirus, yavuze ko Amerika imaze gupima abaturage 4.9 kugeza ubu, kandi iri gukorana na ba guverineri mu kongera uwo mubare w’abapimwa.

Umushinga w’itegeko ry’inkunga y’ingoboka mu bukungu ingana na miliyari 484 z’amadolari, ryatowe n’inteko ishingamategeko ku wa kane, rikubiyemo no gutera inkunga no kwagura ibikorwa byo gupima.

Ni inkunga ya kane yemejwe n’ubutegetsi bw’Amerika ijyanye na Covid-19. Ndetse iteganya no kugoboka ibitaro no gutanga inguzanyo ku bucuruzi buciriritse.

Ejo ku wa gatanu Perezida Donald Trump yashyize umukono kuri uwo mushinga w’itegeko uhita uhinduka itegeko, avuga ko ashaka "kwihutisha kugoboka mu bukungu abaturage bacu".

Inkuru ya BBC