Umuganga wo muri Nigeria yishwe na Covid-19 nyuma yo kuyandura mu gihe yariho yita ku muntu uyifite wari wagannye ivuriro rye ryigenga.

Sponsored Ad

Uyu muganga yajyanywe mu bitaro bya Kaminuza i Lagos kuwa mbere apfa kuwa gatatu nk’uko uyobora ibi bitaro Chris Bode abitangaza.

Bwana Bode avuga ko uyu muganga yagejejwe ku bitaro arembejwe n’ibimeneyetso by’iki cyorezo.

Ishyirahamwe ry’abaganga muri Nigeria rivuga ko uyu wapfuye, Dr Chugbo Emeka, yanduye ubwo yariho yita ku murwayi wishwe n’iki cyorezo kuwa gatanu ushize.

Iri shyirahamwe rivuga ko amakuru rikesha ikinyamakuru Vanguard, ari uko uyu muganga w’imyaka 51 yari asanzwe arwara indwara ya Asthma.

Iri shyirahamwe rirasaba leta zigize Nigeria gufasha abaganga kubona imyambaro ibarinda kwandura mu gihe bita ku barwayi banyuranye muri iki cyorezo.

Risaba kandi abarwayi kubwira ukuri abaganga ku buzima bwabo, ingendo bakoze n’abantu babonanye kugira ngo bamenye uko bitwara.

Abaganga b’Abashinwa baje gufasha Afurika

Amatsinda y’abaganga b’Abashinwa yahagurutse iwabo aza muri Ethiopia na Burkina Faso gufasha ibi bihugu guhangana na coronavirus nk’uko bivugwa n’ikinyamakuru cya leta China Global Television Network.

Umubare wabo ntabwo uzwi neza, gusa bahagurutse uyu munsi kuwa kane baza muri Afurika nk’uko minisiteri y’ububanyi n’amahanga yaho ibivuga.

Biteganyijwe ko bazatanga ubunararibonye, ubuyobozi n’inama mu guhangana no kwirinda iki cyorezo muri ibi bihugu bibiri.

Nigeria nayo irateganya kuzana abaganga 18 bavuye mu Bushinwa bakaza kuyifasha kurwana n’iki cyorezo, gusa bamwe mu baganga bo mu gihugu bagaragaje ko batabyishimiye.

Ishyirahamwe ryabo rivuga ko hakwiye gukoreshwa abaganga benshi badafite akazi bari mu gihugu.

Ku Isi hose, miliyoni 2.06 nibo bantu bamaze kwandura Coronavirus mu gihe abarenga ibihumbi 137 bo imaze kubahitana biganjemo abo muri Leta Zunze Ubumwe za Amerika.

Muri Afurika, Algeria ni yo iri imbere mu kugira abantu benshi bapfa kuko biyongereyeho icumi bakaba bageze kuri 336 mu gihe Afurika y’Epfo ifite ubwandu bwinshi ku mugabane wose bungana na 2 506 ariko abantu bamaze gupfa bo ni 34.

Mu Rwanda abanduye bose ni 136 mu gihe abakize ari 54, mu Burundi hamaze kwandura abantu batanu mu gihe umwe ariwe wapfuye, Tanzania yo yagize abantu 88 banduye biyongereyeho 35 kuri uyu wa Gatatu mu gihe umwe ariwe umaze gupfa. Ni imibare iteye inkeke mu gihe Perezida Magufuli yanze gufunga ibikorwa mu kwirinda ikwirakwira rya Coronavirus.

Uganda ifite ubwandu 55, abakize ni 12, Kenya abanduye ni 225 mu gihe icumi aribo bamaze kwitaba Imana.