Perezida wa Tanzania John Magufuli ari mu gihugu kandi ari mu biro bye aho arimo gukora cyane, nkuko bivugwa na minisitiri w’intebe w’iki gihugu, washyize iherezo ku bihuha by’aho aherereye n’uko ubuzima bwe bumeze.

Sponsored Ad

Minisitiri w’intebe Kassim Majaliwa yagize ati: "Banyatanzania nimutuze, perezida wanyu arahari, afite ubuzima bwiza, arimo gukora".

Yabivugiye mu masengesho yo ku wa gatanu mu musigiti wo mu mujyi wa Njombe mu majyepfo ya Tanzania.

Hamaze igihe hari uguhwihwisa ko Perezida Magufuli arwaye Covid-19 kandi ko yavuriwe muri Kenya akaza kujyanwa no mu Buhinde.

Bwana Majaliwa yagize ati: "Afite [Perezida Magufuli] umurundo w’amadosiye. Ubu niyo ari ho [mu biro] arimo anyura mu madosiye, muravuga muti ’Ararwaye, niyigaragaze’. Agendere kuri gahunda yanyu bwite cyangwa kuri gahunda ye y’akazi?"

Ati: "Perezida afite gahunda ye bwite y’akazi kandi ntabwo ashobora kwigaragaza ku mabwiriza yanyu".

Bwana Majaliwa nta kindi kimenyetso yatanze cyo kunganira ibyo yavuze.

Leta ya Tanzania imaze igihe ishinjwa gukerensa ubukana bwa coronavirus.

Ku munsi w’ejo,Ambasaderi wa Tanzania muri Namibia, Modestus Kipilimba, nawe yahakanye amakuru yari amaze iminsi acicikana avuga ko Perezida w’iki gihugu, Dr John Pombe Magufuli, arwaye Covid-19 ndetse ko yajyanywe kuvurirwa mu Buhinde.

Inkuru z’uko Magufuli arwaye zatangijwe na Tundu Lissu utavuga rumwe n’ubutegetsi ndetse yemeza ko uyu mugabo yajyanwe kuvurirwa mu Buhinde. Yavuze ko arwaye icyorezo cya COVID-19 ndetse ari muri coma.

Lissu yabwiye Reuters ko aya makuru ayakesha abakora mu nzego z’ubuzima n’umutekano muri Kenya, aho byavugwaga ko Perezida Magufuli amaze iminsi arwariye. Ngo banamubwiye ko uyu mugabo wamuhigitse mu matora y’umukuru w’igihugu ari muri coma.

Lissu yavuze ko Magufuli yari amaze iminsi arwariye muri Kenya mu Murwa Mukuru Nairobi, gusa ngo aza kuhakurwa ajyanwa mu Buhinde. Uyu mugabo yavuze ko Perezida Magufuli “ari muri coma kuva ku wa Gatatu” gusa ntiyagaragaza gihamya cy’ibyo avuga.

Mu kiganiro Ambasaderi Modestus Kipilimba yagiranye na Namibian Broadcasting Corporation yahakanye aya makuru yo kurwara kwa Perezida Magufuli, avuga ko ari muzima kandi akomeje inshingano ze.

Amakuru y’uko Perezida Magufuli yaba yaranduye COVID-19 yatangiye guhwihwiswa mu ntangiriro z’iki cyumweru, nyuma yo kumara ibyumweru bibiri atagaragara mu ruhame.

Hashize iminsi Umunyamabanga Mukuru wa Magufuli, John William Herbert Kijazi, yitabye Imana bikavugwa ko nawe yazize COVID-19.

Source:BBC