Muri iki gitondo tariki ya 13 Mata 2020,igihugu cya Tanzania kimaze gutangaza ko cyabonye abantu bashya 14 banduye Coronavirus. Ibi byatumye abamaze kuyandura baba 46 nubwo Leta yanze guhagarika amateraniro ahuza abantu.

Sponsored Ad

Minisitiri y’ubuzima muri Tanzania yatangaje ko hari abandi bantu bashya 14 banduye indwara ya coronavirus muri icyo gihugu.

Abo bantu bose ni abanya Tanzania,barimo 13 mbo mu mujyi wa Dar es Salaam, undi nawe akaba ari uwo mu mujyi wa Arusha.

Kugeza ubu abantu 46 nibo bamaze gutangazwa ko banduye Covid-19 muri icyo gihugu.Hamaze gukiramo 5 naho 3 barapfuye.

Muri iri tangazo minisiteri y’ubuzima yavuze ko abo barwayi bose barimo gukurikiranwa n’abaganga.

Iryo tangazo kandi rivuga ko n’abakekwa ko babonanye n’abo bantu barimo gushakishwa.

Uturere tumaze kubonekamo Coronavirus muri Tanzania ni Dar es Salaam, Zanzibar, Arusha na Mwanza.

Ejo kuku cyumweru, ikigo gishinzwe ingendo zo mu kirere (TCAA) cyatangaje ko cyahagaritse indege zose zitwara abantu kwinjira muri icyo gihugu.

Itangazo ryasohowe n’ikigo TCAA rivuga ko indege zemerewe kwinjira muri icyo gihugu ari izitwara imizigo gusa.

Ryongeyeho riti: "Abapilote n’abandi bakozi bose bo muri izo ndege bazabanza gushyirwa mu bigo byateguwe na leta byo gushyira mu kato abikwa ko banduye kandi bazimenyera ibibatunga".

Iyi ngingo ifashwe mu gihe leta ya Tanzania inegurwa n’abahaanga batari bake hamwe n’ibitangazamakuru mpuzamahanga bimwe na bimwe ku buryo ifatana uburemere buke iki cyorezo.

Ingamba za Perezida John Magufuli yo kudafunga insengero yanenzwe na benshi muri iki gihe ibihugu byinshi byahagaritse amakoraniro ahuza abantu harimo insengero,utubari,amasitade n’ibindi bihuza benshi.

Mu bindi bihugu byo mu karere ka Afrika y’Iburasirazuba, abamaze gutangazwa ko banduye ni batanu mu Burundi,197 muri Kenya, 126 mu Rwanda, bane muri Sudani y’Epfo, hamwe na 54 muri Uganda.

Kuwa 22 Werurwe 2020,Perezida John Pombe Magufuli wa Tanzania,yasabye abaturage b’iki gihugu kudatinya kujya gusenga ngo kuko ngo mu nsengero ariho hari umuti nyawo wa coronavirus.

Perezida Magufuli yari mu misa muri kiliziya ya Mutagatifu Paulo mu mujyi wa Dodoma aho yasabye Abatanzaniya kutagira ubwoba.

Magufuli yagize ati: "Ntidutinye kujya gushima no gusenga Imana buri wese mu kwemera kwe, niyo mpamvu nka leta tutafunze aho gusengera mu misigiti cyangwa amakanisa kuko tuzi neza ko aho mu misigiti no mu makanisa ariho hari umuti w’ukuri.

"Aho niho hari Imana, niyo mpamvu nanjye kuza hano ntabitinye, corona uwo ni shitani ntabwo ashobora kwicara mu mubiri wa Yesu azaba yamaze gupfira aho kure".

Ibyavuzwe na perezida Magufuli bamwe bagaragaje ko ari ugushyira igihugu mu kaga kuko hari aho byagaragaye ko nyuma y’amahuriro y’abantu benshi virus ya Covid-19 ihita yiyongera.

Ibi byabonetse cyane mu bihugu nka Senegal na Malaysia aho hari abirengagije amabwiriza abuza amakoraniro y’abasenga nyuma imibare y’abanduye igahita yiyongera cyane.

Hari abandi ariko babona ko ibyatangajwe na Magufuli bifite akamaro mu kwizera ko amasengesho ariyo ntwaro nyayo yo kurwanya iyi virus.

Perezida Magufuli abwira abaturage ko nubwo bakomeza amateraniro y’abasenga ariko bakwiriye gukurikiza amabwiriza yose yo kwirinda nk’uko bitangazwa n’ibiro by’umukuru w’igihugu muri Tanzania.