skol
fortebet

U Burundi bugiye kujya mu bihugu byakingiye abaturage babyo Covid-19

Yanditswe: Monday 18, Oct 2021

featured-image

Sponsored Ad

Biteganyijwe ko kuwa mbere ibikorwa bigendanye no gukingira Covid-19 bitangira mu Burundi, kimwe mu bihugu bitatu ku isi byari bitaratangira gutanga inkingo z’iki cyorezo.

Sponsored Ad

Abantu bacye nibo bitabiriye ibi bikorwa mu gitondo cyo kuwa mbere mu murwa mukuru w’ubukungu wa Bujumbura nk’uko bamwe mu baturage baho babibwiye BBC Gahuzamiryango.

Mu kwezi kwa gatatu uyu mwaka abashinzwe ubuzima mu Burundi bavuze ko politiki ya leta kuri iki cyorezo ari ugupima, kuvura no gushishikariza abantu kucyirinda, naho ku gukingira bahisemo "kuba turindiriye".

Gusa mu kwezi kwa karindwi, aba bategetsi bafunguriye imiryango inkunga z’inkingo, bavuga ko "uzabishaka ari we uzikingiza".

Nyuma y’uko mu cyumweru gishize Ubushinwa buhaye u Burundi inkunga ya doze 500,000 z’urukingo rwa Sinopharm, leta yatangaje ko gahunda zigendanye no gukingira ababishaka bitangira ku wa mbere.

Mu kwakira izi nkingo, minisitiri w’ubuzima Dr Thaddée Ndikumana yavuze ko abazemera guterwa uru rukingo bagomba gusinya inyandiko yemeza ubushake bwabo, kandi abazakingirwa ari abazaba babanje gupimwa Covid bagasanga ntayo bafite.

Kwipimisha Covid mu Burundi ubusanzwe ni ubuntu uretse gusa ku bagiye gukora ingendo mu mahanga.

Ibi bikorwa nibyo byatangiye ku wa mbere i Bujumbura aho abashaka kwikingiza bajya ahateganyijwe kwiyandikisha, gusinya inyandiko y’ubushake no gupimwa Covid bagategereza ibisubizo, nyuma nibwo bazaterwa urukingo.

Kimwe n’ahandi ku isi urukingo rwa Covid ntiruvugwaho rumwe, mu Burundi hari benshi bagaragaza kurushidikanya, nubwo hari n’abanenze leta gutinda gufata ingingo yo kugeza izi nkingo ku baturage.

Mu cyumweru gishize minisitiri w’ubuzima yavuze ko abaherwaho muri iki gikorwa ari "abafite indwara zidakira, abantu barengeje imyaka 60, hamwe n’abakora mu buvuzi."

Ishami rya ONU rishinzwe ubuzima OMS mu Burundi ritangaza ko mu mpera z’icyumweru gishize ryahuguye abakozi bazakingira abantu.

Mu cyumweru gishize Tedros Ghebreyesus ukuriye OMS yavuze ko ibihugu 56 byiganjemo ibya Africa aribyo bitageze ku ntego y’isi yo gukingira 10% by’abaturage babyo ku mpera y’ukwezi kwa cyenda.

Yongeraho ko u Burundi, Eritrea, Korea ya Ruguru ari byo bihugu bitatu byari bitaratangira gahunda zo gukingira iki cyorezo.

Biteganyijwe ko iyi gahunda itangira uyu munsi mu Burundi ivana iki gihugu muri ibyo bitatu.

U Burundi bwitezwe kuzakira izindi nkunga z’inkingo zemewe n’imiryango y’ibihugu hamwe n’ibihugu bitandukanye.

Urukingo rwa Sinopharm rwakozwe n’Ubushinwa rutangwa muri doze ebyiri, iya kabiri ifatwa nyuma y’ibyumweru hagati ya bitatu na bine nyuma yo gufata urwa mbere.

Kugeza mu mpera z’icyumweru gishize, imibare ya OMS yerekana ko mu Burundi kuva mu kwa gatatu 2020 abanduye Covid ari 19,550 naho abo imaze kwica ari 14.

Imibare bamwe mu bigenga mu Burundi bavuga ko yaba itajyanye n’ukuri kw’uko ibintu byifashe.

BBC

Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa