skol

Impamvu Naledi Manyoni wari mu nzu iri gushya yajugunyiye umwana we abantu atazi

Amakuru   Yanditswe na: Dusingizimana Remy 15 July 2021

Umugore wajugunyiye abantu atazi umwana we ari mu nzu yuzuye umwotsi yo mu mujyi ukora ku nyanja wa Durban muri Afurika y’epfo, yabwiye BBC ukuntu ashimira abarokoye umwana we w’umukobwa, uzuzuza imyaka ibiri mu kwezi gutaha.


Naledi Manyoni, w’imyaka 26, yagize ati: "Icyo nashoboraga gukora cyonyine kwari ukwizera abantu ntazi na busa". Yongeyeho ko ubu we n’umwana we bameze neza.

Inyubako bari barimo yakongejwe n’abasahuraga.

Imidugararo yatewe n’ifungwa rya Jacob Zuma wahoze ari Perezida w’iki gihugu.

Uwo mugabo w’imyaka 79, mu kwezi gushize yahamijwe gusuzugura ubucamanza, nyuma yuko yanze kwitabira iperereza kuri ruswa yo mu gihe cy’ubutegetsi bwe.

Nijoro ku wa gatatu w’icyumweru gishize ni bwo yishyikirike polisi atangira igifungo yakatiwe cy’amezi 15.

Ariko ibi byateje imyigaragambyo irimo urugomo, ibitero byo gutwika, ndetse n’abafatiranye iki gihe bagasahura mu ntara avukamo ya KwaZulu-Natal, binagera no mu yindi mijyi minini imwe n’imito.

Abantu batari munsi ya 72 bamaze gupfira mu cyo Perezida Cyril Ramaphosa yavuze ko ari rumwe mu rugomo rubi cyane rubayeho muri iki gihugu kuva mu myaka ya 1990, mbere yuko harangira ubutegetsi bw’ivanguramoko bwa ba nyamucye b’abazungu buzwi nka apartheid.

Umwana Melokuhle yatabawe gute?

Umunyamakuru wa BBC ufata amashusho Thuthuka Zondi yafotoye Madamu Manyoni ajugunya umwana we Melokuhle, ubwo bari hejuru mu nyubako yo ku muhanda uri rwagati mu mujyi wa Durban ku wa kabiri nyuma ya saa sita z’amanywa, iyo nyubako yamaze kugerwamo n’abasahuzi.

Abasahuraga mu maduka yo mu gice cyo hasi cy’iyo nyubako, bari batangiye gutwika n’igice cyayo cy’aho Madamu Manyoni yari amaze igihe asura umukunzi we.

Bari bari mu igofora rya 16 ry’iyo nyubako ubwo babonaga umwotsi urimo kuzamuka.

Icyuma kimanura kikanazamura abantu mu nyubako y’amagorofa, kizwi nka ’lift’ cyangwa ’ascenseur’, ntabwo cyarimo gukora kubera umuriro.

Rero Madamu Manyoni yirutse afite ubwoba bwinshi amanuka ku madaraJYA ahagatiye umwana we.

Ariko ntiyashoboye kugera ku gice cyo hasi cy’iyo nyubako kuko cyari cyafunzwe.

Avuga ko yashoboye kwihata akagera ahari ibaraza ku igorofa ya kabiri, aho yasabiye ubufasha abahisi n’abagenzi (abatambukaga hafi aho).

Yagize ati: "Ikintu natekerezaga gusa kwari ugutuma umwana wanjye abaho".

Abazimya umuriro bahageze hashize hafi iminota 20, nyuma yuko imbaga y’abantu yari yatangiye gutabara abandi bari muri iyo nyubako, ikoresheje inzego, ari na bwo Madamu Manyoni yongeye gusubirana n’umukobwa we.

Yabwiye BBC ko hafi saa sita za nijoro bashoboye gusubira mu cyumba cyabo cyo muri iyo nyubako.

Ubusabe bw’Umwami w’Aba-Zulu

Iyi midugararo imaze iminsi yatumye i Durban habaho ikibazo cy’ibura ry’umugati n’ibitoro, aho imirongo miremire y’abashakisha n’umugati mucyeya usigaye yabonetse hanze y’amaduka, ndetse n’imirongo miremire y’imodoka kuri za stasiyo.

Ku wa kabiri, ikigo cya mbere kinini gitunganya ibitoro muri Afurika y’epfo cyavuze ko kibaye gihagaritse ibikorwa, kivuga ko bitewe n’imidugararo mu gihugu n’ingorane mu mihanda yatumaga gikwirakwiza ibitoro iva n’ijya muri KwaZulu-Natal.

Hagati aho, umukuru w’umuryango munini w’abahinzi bo muri Afurika y’epfo, umuryango uzwi nka AgriSA, yavuze ko abahinzi barimo kugorwa no kugeza umusaruro wabo ku isoko kubera "akajagari" kabayeho mu mikorere.

Christo van der Rheede, umukuru wa AgriSA, yabwiye ibiro ntaramakuru AFP ati:

"Ducyeneye ko hasubiraho iyubahirizwa ry’amategeko n’umutekano mu gihe cya vuba gishoboka, kubera ko turi bugire amakuba akomeye".

Mu ijambo rye rya mbere avuze kuri uru rugomo, Umwami w’Aba-Zulu Misuzulu kaZwelithini yamaganye ubusahuzi, avuga ko bugaragaza isura mbi ku baturage, kandi ko ibisenywa bigira ingaruka ku bacyene gusa.

Yagize ati: "Nta na rimwe nari narigeze ntekereza ko abantu ba data bagira uruhare mu gutwika igihugu cyabo bwite".

Umwami Misuzulu, wimye ingoma mu ntangiriro y’uyu mwaka nyuma yuko ababyeyi be bapfuye, yongeyeho ati:

"Kumenya ko ibi byose birimo kuba mu gihe cy’icyorezo, aho ubwoko bw’iyi virusi bubi cyane bugeze ku kigero cyo hejuru cyane, bigeza gusa kuri uyu mwanzuro: abantu ba data barimo kwiyahura".


Madamu Naledi Manyoni n’umwana we w’umukobwa witwa Melokuhle

BBC

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Uganda: Ikindi gisasu cyaturikiye muri Bisi yerekezaga hanze ya...

Igipolisi cya Uganda kirimo gukora iperereza ku gisasu cyaturikiye muri...
26 October 2021 0

Sudan: Abigaragambya bishwe abandi babarirwa muri za mirongo...

Abantu batari munsi ya batatu bitangazwa ko bapfuye naho abandi bagera kuri...
26 October 2021 0

Uganda: Igisasu cyahitanye umuntu umwe i Kampala cyigambwe na...

Polisi ya Uganda ivuga ko umuntu umwe yapfuye naho abandi batatu...
25 October 2021 0

Uganda: Igisasu cyaturikirijwe muri Bar-Resto abantu babiri bahasiga...

Mu ijoro ryo wa gatandatu, abapolisi ba Uganda bavuze ko umuntu umwe...
24 October 2021 0

Colombia: Umucuruzi w’ibiyobyabwenge wa mbere washakishwaga cyane...

Umucuruzi w’ibiyobyabwenge washakishwaga cyane muri Colombia wari unakuriye...
24 October 2021 0

Misile ya Koreya ya ruguru yatumye UN ikora inama y’igitaraganya

Inteko y’Umuryango w’Abibumbye ishinzwe umutekano ku isi yateranye byihutirwa...
21 October 2021 0