Nibura abantu 11 bamaze kugwa mu myigaragambyo yo kwamagana Leta muri Kenya, ndetse abandi 567 batawe muri yombi, nk’uko bitangazwa n’inzego z’umutekano.

Polisi yarashe ku bigaragambya, kandi mbere yaho, Dr Aron Sikuku, umuganga ukorera ku bitaro bya Eagle Nursing Home biri ku nkengero za Nairobi, yabwiye BBC ko imirambo y’abantu babiri barashwe yazanywe kuri ibyo bitaro.

Yavuze ko abantu amagana bigaragambyaga bari bateraniye imbere y’ibitaro basaba ko imirambo yatangirwa.

Iyi myigaragambyo ibaye ngo bizihize imyaka 35 y’imyigaragambyo ya Saba Saba yabaye ku wa 7 Nyakanga 1990 (7/7/1990), yari igamije gusaba uburenganzira bushingiye kuri politiki y’amashyaka menshi.

Ku wa Mbere nimugoroba, Polisi yasohoye itangazo ishima abapolisi “ku bwihangane n’ubunyamwuga bagaragaza mu gihe bahuraga n’urugomo n’ubushotoranyi”. Yavuze ko abapolisi 52 n’abasivili 11 bakomerekejwe.

Komisiyo y’igihugu ishinzwe uburenganzira bwa muntu (KHRC), yashyizweho na Leta, yari yatangaje mbere ko abantu nibura 10 bamaze kwicwa.

Mu itangazo rikomeye, iyo komisiyo yashinje Polisi gukoresha ingufu zirengeje urugero, nk’uko byagiye bigaragara mu myigaragambyo y’ubu bwoko yabanje.

Yavuze ko ku wa Mbere “abapolisi bari bambaye imyenda isanzwe, bakoresha imodoka zitagaragaza ko ari iza Leta” kandi ko “bakoranye n’amabandi yitwaje intwaro mu mijyi ya Nairobi, Kajiado, Nakuru, Kiambu na Eldoret”. Polisi yo yahakanye ibi birego mbere.

Yakomeje ivuga ko ifite ibimenyetso bigaragaza ko nibura abantu babiri bashimuswe, hamwe n’abakomeretse 29 n’abatawe muri yombi 37 hirya no hino mu gihugu.

Imihanda ijya ahantu nyamukuru harimo n’urugo rw’umukuru w’igihugu (State House) n’inteko ishinga amategeko (parliament), yari ifunzwe n’imigozi y’amashanyarazi ishobora gukomeretsa (razor wire).

Amashuri amwe yasabye abanyeshuri kuguma mu ngo.

I Nairobi, ahantu hatandukanye habaye imvururu aho abigaragambyaga batwitse ibiti n’imyotsi, bagerageza kwinjira ahari abapolisi, ariko polisi ibasubiza irasa ibyuka biryana mu maso n’amazi menshi.

Nk’uko ikinyamakuru The Nation kibivuga, imyigaragambyo yageze mu turere 17 muri 47 tugize Kenya.

Mu karere ka Meru mu burasirazuba bwa Kenya, inzu y’ubucuruzi iri mu mujyi wa Makutano yafashwe n’inkongi y’umuriro. Umwotsi mwinshi w’umukara wagaragaraga.

Mu mujyi wa Ol Kalou, umuntu umwe yararashwe ahita apfa, undi araraswa arakomereka ariko ntiyapfa.