Itsinda ry’abakozi ba Ministeri y’Ubwubatsi n’Imiturire mu Mijyi muri Congo-Brazzaville ryasuye u Rwanda mu rwego rwo gusangira ubumenyi ku miturire n’imitunganyirize y’imijyi, rinyurwa n’uburyo bw’ikoranabuhanga bwifashishwa mu kwihutisha serivisi zihabwa abaturage.

Ni uruzinduko rushingiye ku masezerano y’ubufatanye hagati y’Ikigo cy’Igihugu cy’Imiturire (RHA) n’icyo muri Congo-Brazzaville cya SOPRIM (Société de Promotion Immobilière).

Kuva ryagera mu Rwanda kuva tariki ya 25 Kanama 2025, riyobowe n’Umuyobozi w’Ibiro bya Minisiteri y’Ubwubatsi n’Imiturire y’Imijyi muri Congo-Brazzaville, Dr. Julio Nganongo Ossere, ryakoreye ingendoshuri hirya no hino mu gihugu.

Uyu yari kumwe n’inzobere enye mu rwego rwo kwigira ku bunararibonye u Rwanda rufite mu bijyanye n’iterambere ry’imijyi, imiturire irambye n’imitangire ya serivisi z’ubwubatsi.

Mu nzego zitandukanye ryasuye zirimo Akarere ka Rubavu, Minisiteri y’Ibikorwaremezo (MININFRA), aho zakiriwe n’Umuyobozi ushinzwe Imiturire y’Imijyi n’Ubukungu Buyishingiyeho, Dr. Jack Ngarambe.

Zasuye Akarere ka Rubavu, zinasura Ikigo cy’Igihugu gishinzwe Imiturire (Rwanda Housing Authority- RHA), aho zakiriwe n’Umuyobozi Mukuru wacyo Alphonse Rukaburandekwe.

Umujyi wa Kigali na wo wakiriye iri tsinda, urisobanurira imiterere n’imikorere y’urubuga ‘KUBAKA’, rwashyizweho mu rwego rwo gufasha abaturage gusaba no guhabwa uburenganzira bwo kubaka mu buryo bworoshye, bwihuse kandi bunoze.

Nganongo yashimye uburyo bw’iri koranabuhanga bukoreshwa mu Rwanda, ahamya ko bugiye gutangira gukoreshwa iwabo.

Ati “Iyi sisitemu ikoreshwa mu Rwanda yatubereye isomo rikomeye, kuko natwe dufite umushinga wo gushyiraho uburyo nk’ubu kuva 2026. Mu by’ukuri turanyuzwe kandi twizeye ko tuzakoresha ubumenyi twasangijwe na bagenzi bacu kugira ngo tuzabishyire mu bikorwa.”

RHA na SOPRIM byashyize umukono ku masezerano y’imikoranire tariki ya 24 Ugushyingo 2021, bigamije guteza imbere ubufatanye mu rwego rw’imiturire, imijyi no kubaka inzu ziciriritse kandi zigezweho.

Hashize imyaka ine RHA ishyize umukono ku masezerano y’imikoranire na SOPRIM

Uruzinduko rw’iri tsinda rwamaze iminsi itanu mu Rwanda

Itsinda ryaturutse muri Congo-Brazzaville ryigiye byinshi mu Rwanda birimo imitunganyirize y’imijyi

Umujyi wa Kigali wasobanuriye iri tsinda imikorere y’urubuga ’KUBAKA’

Dr. Julio Osséré Nganongo ni we wari uyoboye iri tsinda