Perezida w’u Rwanda Paul Kagame yifurije umwaka mushya muhire wa 2019 ingabo z’ u Rwanda, kuri Noheri anaboneraho umwanya wo kuzibutsa ko Abanyarwanda bose bazikunda kandi bazifuriza ibyiza.

Ku munsi w’ejo Taliki ya 25 Ukuboza 2018, Perezida Kagame yabwiye ingabo z’u Rwanda bazubahira ubunyamwuga buziranga aboneraho kuzifuriza ishya n’ihirwe mu mwaka wa 2019.

Yagize ati “Abanyarwanda baha agaciro uburyo mwitangamo, bidashingiye ku buryo mubacungira umutekano gusa ahubwo n’uruhare rwanyu mugaragaza mu kubungabunga amahoro arambye murinda ibishobora byose kubangamira ikiremwamuntu.

Nta cyatunanira mu gihe cyose dufite imitekerereze ihamye kandi ikwiye. Twarenze imbogamizi nyinshi mu bihe byashize kandi ntibizaduca intege mu gukomeza gushaka icyateza imbere u Rwanda no mu bihe bizaza."

Kagame yibukije ingabo ko arizo ba ambasaderi bakomeye u Rwanda rufite mu mahanga kuko baruhagararira neza mu butumwa bw’amahoro hirya no hino ku isi.