Perezida w’ u Rwanda Paul Kagame kuri uyu wa 13 Kamena yakiriwe mu biro bya Perezida w’ Uburusiya ’Klemlin’ na Perezida Vladmir Putin w’Uburusiya mbere y’uko yitabira umuhango wo gutangiza imikino y’igikombe cy’isi.

Sponsored Ad

Mu cyumweru gishize Minisitiri w’ububanyi n’amahanga w’Uburusiya Sergey Lavrov yari mu Rwanda. Mu kiganiro bagiranye n’abanyamakuru we na mugenzi we Louise Mushikiwabo bavuze ko umubano w’ibihugu byombi ugiye kurushaho gukomezwa.
Minisitiri Mushikiwabo yatangaje ko mu byo bumvikanye harimo no gutegura inzinduko z’abakuru b’ibihugu hagati ya Kigali na Moscow.

Biteganyijwe ko Perezida Kagame, akaba n’umuyobozi w’umuryango w’ubumwe bwa Africa, ari bwitabire umuhango wo gutangiza igikombe cy’isi cya 2018 mu mupira w’amaguru uzaba ejo kuwa kane Uburusiya bukina na Arabia Saoudite saa kumi n’imwe.

Perezida Paul Kagame kandi ni inshuti ya Perezida wa FIFA Gianni Infantino waje mu Rwanda muri Gashyantare umwaka ushize akajya kumureba aho yari ari i Gabiro mu mwiherero w’abayobozi bakuru. Muri Nzeri umwaka ushize, Perezida Kagame nawe yasuye ikicaro cya FIFA i Zurich.

Perezida Vladimir Putin asuhuza Ambasaderi w’u Rwanda mu Burusiya, Dr Mujawamariya Jeanne d’Arc