skol
Kigali

U Rwanda rwijeje u Burundi gushakira igisubizo ikibazo cy’abashatse guhirika ubutegetsi bwarwo bari i Kigali

Amakuru   Yanditswe na: Dusingizimana Remy 26 February 2022

Guverinoma y’u Rwanda n’iy’u Burundi zagiranye ibiganiro ku bufatanye mu rwego rw’ubutabera by’umwihariko ingingo ijyanye n’abashatse guhirika ubutegetsi bwa Perezida Pierre Nkurunziza mu 2015.

Ni ibiganiro byabaye kuri uyu wa Gatanu tariki 25 Gashyantare 2022, bihuza Minisitiri w’Ubutabera akaba n’Intumwa Nkuru ya Leta y’u Rwanda, Dr Ugirashebuja Emmanuel na mugenzi we w’u Burundi, Banyankimbona Domine.

Nyuma y’ibiganiro byo mu muhezo, abanyamakuru batangarijwe imyanzuro mu itangazo ryasomwe na Umurungi Providence uyobora ishami ry’ubutabera mpuzamahanga muri Minisiteri y’Ubutabera.

Yavuze ko impande zombi zaganiriye ku ngingo zitandukanye kandi zafashe imyanzuro irimo gukomeza guteza imbere ubufatanye mu rwego rw’ubutabera by’umwihariko guhererekanya abanyabyaha.

Ati “Impande zombi kandi zaganiriye ku bufatanye mu bijyanye no guhanahana abakurikiranyweho ibyaha bari mu bihugu byombi.”

Ingingo y’umwihariko kuri iki kintu cyo guhererekanya abanyabyaha, ni iyo kuba u Rwanda rwashyikiriza icyo gihugu abakekwaho kugira uruhare muri “Coup d’état” yari igamije guhirika ku butegetsi Pierre Nkurunziza mu 2015.

Iki ni ikibazo kimaze igihe kiganirwaho n’impande zombi kuko u Burundi bushinja u Rwanda gucumbikira abakekwaho kuba inyuma y’umugambi wo gushaka guhirika ubutegetsi bwa Nkurunziza witabye Imana mu 2020.

Kuri uyu wa Gatanu, abashinzwe ubutabera ku mpande zombi nabo baganiriye kuri iki kibazo ndetse bagaragaza ko hari icyizere cy’uko kizakemuka.

Umurungi ati “Ku kibazo kimwe cyihariye kijyanye n’abantu bamwe bakurikiranywe n’u Burundi ku kuba baragerageje guhirika ubutegetsi i Burundi mu 2015, inama yasanze cyaragiye kiganirwaho n’inzego zitandukanye.”

Yakomeje agira ati “Bigaragara ko hari ubushake bwa politiki ku mpande zombi bwo gukemura icyo kibazo kandi kikazakomeza kuganirwaho.”

Yavuze ko impande zombi zemeranyije ko ibiganiro nk’ibi bizakomeza kubaho mu rwego rwo gukomeza imikoranire mu butabera.

Izindi ngingo zaganiriweho na Minisitiri Dr Ugirashebuja na mugenzi we w’u Burundi, harimo ijyanye n’ubufasha u Rwanda rwahaye iki gihugu bwo gucyura impunzi zari zarahungiye mu Rwanda nyuma y’imvururu zo mu 2015.

Kugeza ku wa 31 Ukuboza 2021, abagera kuri 29,442 nibo bafashijwe n’u Rwanda gutahuka mu Burundi mu gihe abamaze gutaha bose hamwe ari ibihumbi 72.

Minisitiri Banyankimbona yashimye u Rwanda avuga ko abaturage babo bagezeyo amahoro.

Ati “Ubu bari mu mirimo bakomeje gufatanya n’abandi mu kubaka igihugu cyacu.”

Ibikorwa byo gucyura impunzi z’Abarundi zari zarahungiye mu Rwanda byakozwe nyuma y’ubusabe bwa Perezida Ndayishimiye mu Ukwakira 2020.

IGIHE

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

"Ndagira ngo mbabwire ko bazaza vuba"-Minisitiri w’Intebe avuga ku bimukira...

Minisitiri w’Intebe,Dr Ngirente Edouard yatangaje ko vuba ahaabimukira...
19 May 2022 0

Minisitiri w’intebe yavuze kuri Dosiye ya Bamporiki n’icyo Leta yiteguye...

Mu kiganiro n’itangazamakuru ku buzima bw’igihugu, Minisitiri w’Intebe yavuze...
18 May 2022 0

"Uganda ntikiri indiri iboneye ku batoroka Leta y’u Rwanda": Mugabe...

Umubano w’u Rwanda na Uganda ukomeje gutera intambwe uzahuka umunsi ku wundi...
18 May 2022 0

Mgr Papias Musengamana yaramburiweho ibiganza mu umuhango wo kumuha...

Kuri uyu wa Gatandatu kuri Stade ya Gicumbi muri Diyosezi ya Byumba,...
14 May 2022 0

Perezida ndayishimiye yatangaje ikizatuma umubano w’Uburundi n’u Rwanda uba...

Perezida Ndayishimiye yavuze ko Gitega na Kigali bari gukora uko bashoboye...
14 May 2022 1

Hasohotse andi makuru y’umusore wigeze kurega Bamporiki kumwambura

Hasohotse andi makuru kuri Bamporiki Edouard uherutse guhagarikwa ku...
10 May 2022 1