Abantu babiri bahitanywe na COVID-19 bituma umubare w’abamaze kwicwa n’iki cyorezo ugera kuri 282 mu gihe abanduye bo biyongereyeho 116. Abarembye ni 13, naho abakize ni 69.Hakingiwe abantu 56.566.

Sponsored Ad

Amakuru yose ya Covid-19 kuri uyu wa mbere:

Habonetse abanduye bashya:116
Abanduye bose:20,302
Hakize:69
Abakize bose:18,635
Hapfuye:2 (Abapfuye n’abagabo babiri b’imyaka 69 na 52 bitabye Imana i Huye)
Abamaze gupfa bose:282
Abakirwaye:1,385
Abarembye:13
Abakingiwe bashya:56,566
Abamaze gukingirwa kuva 05/3/2021:314,015

Kuwa mbere abanyamakuru, abarimu bo muri kaminuza n’abacuruzi muri rimwe mu masoko mu nkengero za Kigali ni ibyiciro byagezweho mu guterwa urukingo rwa Covid-19.

Abantu 257,449 bamaze guterwa urukingo rwa Covid-19, hibanzwe ku bari mu cyiciro cy’abarusha abandi ibyago byo kwandura, nk’uko bivugwa na minisiteri y’ubuzima.

Bamwe mu banyamakuru bakingiwe kuri Kigali Arena batewe urukingo rwa Pfizer, nk’uko umunyamakuru wa BBC i Kigali abivuga.

Abakingiwe bari mu byiciro birimo abashoferi b’amakamyo, ab’imodoka za rusange zitwara abantu, abakorera ibigo bicunga umutekano byigenga, abanyerondo, abakozi bo mu nganda n’abandi bakingiwe mbere.

Nyuma yo gukingirwa, umunyamakuru wa BBC avuga ko aho abakingiwe baruhukira bakurikiranwa mu gihe cy’iminota 15 nta kidasanzwe cyahabonetse kugeza bahasohotse.

Avuga ko muri rusange abari bamaze gukingirwa bariho baganira bavuga ko bishimiye gukingirwa.

Umunyamakuru wa BBC avuga ko bigoye kumenya niba hari uwatewe ikibazo n’urukingo yahawe kuko buri wese nyuma yo gukingirwa agenda ukwe.

Impungenge z’inkingo ziri kuboneka ku mbuga nkoranyambaga nyuma y’uko ibihugu bimwe na bimwe ku isi biri guhagarika gukoresha urukingo rwa AstraZeneca, kubera kuvura kw’amaraso kwabonetse ku barutewe bacye hamwe na hamwe.

Ishami rya ONU ryita ku buzima ku isi WHO/OMS ariko rivuga ko urwo rukingo ari nta ngorane ruteje.