Umuntu wa gatandatu amaze kumenyekana ko nawe yahitanywe n’ inkongi umuriro urimo kogoga amashyamba yo mu majyaruguru ya Leta ya California, muri Leta zunze ubumwe za Amerika.

Abategetsi bo muri County ya Shasta kuri iki Cyumweru batangaje ko umuntu yapfuye nyuma y’ uko atumviye akamo yatewe ngo ahunge.

Yiyongereye ku bandi barimo abana babiri hamwe n’abazimya imiriro babiri bamaze kuhasiga ubuzima.

Abategetsi bavuga ko abandi bantu barindwi bo mu mujyi wa Redding, wo mu majyaruguru ashyira uburasirazuba bwa San Francisco bagishakishwa kuko irengero ryabo ritaramenyekana.

Uwo muriro umaze gutuma abanyagihugu babarirwa mu bihumbi icumi bahunga ingo zabo, naho amazu 517 yiganjemo aya abaturage yarasenyutse.