skol

Rubavu: Polisi yafashe umugore wari ufite magendu y’amabuye y’agaciro arenga ibiro 700

Amakuru   Yanditswe na: Dusingizimana Remy 1 October 2020

Kuwa mbere tariki ya 28 Nzeri Polisi ikorera mu karere ka Rubavu yafashe magendu y’amabuye y’agaciro yo mu bwoko bwa Tourmaline afatirwa mu rugo rwa Mukanoheri Beatrice w’imyaka 27 utuye mu karere ka Rubavu mu murenge wa Gisenyi mu kagari ka Mbugangali mu mudugu wa Gasutamo. Tourmaline ni ubuye rizwiho kubengerana cyane bitewe n’urusobe bw’ubutare burigize rikaba rikorwamo imikufi ibengerana cyane yambarwa mu ijosi.


Umuvugizi wa Polisi y’u Rwanda mu ntara y’Iburengerazuba, Chief Inspector of Police (CIP) Bonaventure Twizere Karekezi yavuze ko Mukanoheri ari umuyobozi muri sosiyete yitwa Amkaba LTD yemerewe gukorera ibikorwa by’ubucukuzi bw’amabuye y’agaciro mu gihugu cya Repubulika iharanira Demokarasi ya Congo (DRC) ndetse isosiyete ya Amkaba ikaba ifitanye ubufatanye mu bucuruzi bw’amabuye y’agaciro n’indi yitwa Paco Gem Gold Stone Business Company zose zikora ubucukuzi bw’amabuye y’agaciro muri Congo.

CIP Karekezi yakomeje avuga ko kugira ngo ariya mabuye afatwe byaturutse ku makuru yatanzwe n’abaturage bari bazi neza ko hari amabuye ari buve mu gihugu cya Repubulika iharanira Demokarasi ya Congo akaza gucuruzwa mu Rwanda mu buryo bwa magendu.

Yagize ati “Abaturage bakimara kumenya ayo makuru babibwiye abapolisi ko hari amabuye ari hagati y’ibiro 700 na 800 Mukanoheri ari bwinjize mu Rwanda mu buryo bwa magendu anyuze mu nzira za rwihishwa. Twahise dutegura igikorwa cyo kumusanga mu rugo rwe.”

Yakomeje avuga ko mu gitondo cya tariki 28 Nzeri abapolisi bagiye gusaka mu nzu ya Mukanoheri basangamo imifuka 12 y’amabuye y’agaciro yo mu bwoko bwa Tourmaline apima ibiro 722, Mukanoheri nawe ashyikirizwa ubutabera.

Ni mugihe nyamara uyu Mukanoheri tariki ya 19 Nzeri yari yishyuye imisoro ingana n’amafaranga y’u Rwanda miliyoni n’ibihumbi 700, uwo musoro ukaba wari uw’amabuye y’agaciro arenga Toni. Mukanoheri yemeye ko kuri iyi nshuro ubwo yafatwaga yashakaga kunyereza umusoro ungana n’amafaranga y’u Rwanda ibihumbi 700 kuri ariya mabuye ibiro 722 byo mu bwoko bwa Tourmaline.

Mukanoheri ndetse n’amabuye yafatanwe yahise ashyikirizwa ishami rya Polisi rishinzwe kurwanya abanyereza imisoro. CIP Karekezi yashimiye abaturage ubufatanye bakomeje kugaragaza mu kurwanya abarenga ku mategeko, abagira inama yo kwirinda kwishora mu bucuruzi bwa magendu kuko ubutabera burahari bazabihanirwa.

Yagize ati “Icyo dukangurira abaturage ni ukubahiriza amategeko bagakora ibintu binyuze mu mucyo igihe bashaka gukora ubucuruzi bw’amabuye y’agaciro n’ubundi bwose. Ubucuruzi bwa magendu ndetse no kunyereza imisoro ni ibyaha bihanwa n’amategeko.”

Umuvugizi wa Polisi mu ntara y’Iburengerazuba yanibukije abantu kubahiriza amabwiriza ya Leta yo kurwanya icyorezo cya COVID-19 bakirinda kwambuka imipaka muri iki gihe yafunzwe.

Ingingo ya 3 mu iteka rya minisitiri ku kurwanya ubucuruzi bwa magendu y’amabuye y’agaciro ivuga ko bibujijwe kwinjiza mu gihugu amabuye y’agaciro mu Rwanda udafite inyandiko z’umwimerere zigaragaza inkomoko ndetse n’uburemere by’ayo mabuye kandi izo nyandiko zigomba kuba zatanzwe inzego zibishinzwe. Ayo mabuye agomba kuba afite inyandiko z’ubucuruzi kandi akaba yarashyizweho ibirango n’inzego zibifitiye ububasha.

Itegeko N° 58/2018 ryo ku wa 13/08/2018 ingingo ya 54 ivuga ko Umuntu wese ushakashaka, ucukura, utunganya, ucuruza amabuye y’agaciro cyangwa kariyeri nta ruhushya, aba akoze icyaha. Iyo abihamijwe n’urukiko, ahanishwa igifungo kitari munsi y’amezi abiri (2) ariko kitarenze amezi atandatu (6) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni eshanu (5.000.000 FRW) cyangwa kimwe gusa muri ibyo bihano.

Urukiko rutegeka kandi ubunyagwe bw’amabuye y’agaciro cyangwa kariyeri byafatiriwe biri mu bubiko, bicuruzwa cyangwa bitunganywa nta ruhushya.

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Kigali: Umugabo yiyahuye asimbutse ku igorofa riri mu mugi rwagati...

Umugabo utaremenyekana imyirondoro yiyahuriye ku nyubako ya La Bonne...
16 September 2021 0

Rusizi: RIB yafunze abantu 11 barimo ba gitifu 2 b’imirenge

Abantu 11 barimo Abanyamabanga Nshingwabikorwa b’Imirenge ibiri batawe muri...
15 September 2021 0

Yatawe muri yombi azira kwambura abakobwa nyuma yo kubakoresha imibonano...

Kuri uyu wa Kabiri, tariki 14 Nzeri 2021,Urwego rw’Igihugu rw’Ubugenzacyaha,...
15 September 2021 0

Abasore n’inkumi 16 bafashwe bari kwizihiza isabukuru ya mugenzi wabo...

Ku Cyumweru tariki ya 12 Nzeri, urubyiruko rw’abasore n’inkumi 16 bafatiwe mu...
14 September 2021 0

Ngoma: Abasore 2 bavukana bari gushakishwa bazira guca umunyerondo...

Abasore babiri bavukana bari gushakishwa uruhindu n’inzego z’umutekano mu...
14 September 2021 0

Igorofa rikoreramo Ikinyamakuru IGIHE ryafashwe n’inkongi y’umuriro

Mu masaha ya saa tatu z’ijoro zo ku Cyumweru tariki ya 12 Nzeri 2021,...
13 September 2021 0