Abaturage bo mu murenge wa Ruhango mu karere ka baravuga ko hari umugabo wapfuye yiyahuye bagakeka ko yabitewe n’uko umugore we amaze iminsi yariyeguriye Imana agahagarika kuryamana n’uwo mugabo we.

Uyu mugore witwa Xavera yabwiye TV1 dukesha iyi nkuru ko Kuwa kabiri tariki ya 29 Kanama yagiye guhinga hanyuma umugabo we amusanga mu murima,uyu mugore amubaza impamvu atazanye ihene.

Uyu mugore ngo yamutumye kuzizana undi aragenda amara isaha ataragaruka nibwo we n’abana babo bagiye kureba basanga ngo amanitse mu kiziriko basanga yiyahuye.

Uyu mugore yagize ati "Ejo twamujyanye kwa muganga,muganga arambwira ati ’madamu,umugabo wawe yimanitse,biragaragara hano ko yimanitse yakumva agiye guhera umwuka,arwana no kwigobotora.

Abajijwe niba hari ikibazo bari bafitanye,uyu mugore yagize ati "Yigiriraga amagambo make,nanjye byarantunguye."

Umukuru w’umudugudu aba batuyemo wa Murehe,yabwiye TV na RADIO 1 ko aba nta kindi kibazo bari bafitanye kizwi uretse ko uyu mugore ngo atubahirizaga inshingano z’abashakanye.

Ati "Birashoboka ko umugore yafata icyemezo kimeze kuriya akanga kuryamana n’umugabo we kandi kiriya gikorwa gitera umunezero abashakanye,bigatuma umugabo yanga kumuca inyuma no kubabaza abana be,akiyahura."

Uyu mudugudu yakomeje avuga ko uyu mugore yahoraga mu masengesho akirengagiza inshingano z’urugo,umugabo ntamenye aho ari.

Abaturage baturanye n’aba bombi bavuze ko uyu mugore yinjiye mu itorero ry’Abakusi/Abagorozi ndetse ngo yirirwaga abwiriza ubutumwa ko Yesu agiye kugaruka,ntabone umwanya wo kwita ku muryango we.

Aba bavuze ko uku kwinjira idini byatumye uyu mugore ahagarika gutera akabariro n’uyu mugabo we bityo ngo aribyo byamuteye kwiyahura.

Aba bombi bari bafitanye abana 3 barimo uw’imyaka 15 mukuru n’umuto w’imyaka 9.Uyu mugabo yapfuye afite imyaka 56.