Umusirikare w’u Rwanda ubarizwa mu mutwe w’ingabo z’umuryango wa Afurika y’iburasirazuba uzwi nka EACRF, yitabiriye ibiganiro byahuze umutwe witwaje intwaro wa M23 n’ingabo za Repubulika ya Demukarasi ya Congo, FARDC.
Uyu musirikare wari wambaye impuzankano ya RDF iriho ikirango cya EACRF yari yaherekeje Komanda w’uyu mutwe, Lieutenant General Jeff Nyagah muri ibi biganiro byabereye mu gace ka Kibumba gahana imbibi nkuko amakuru dukesha Primo.rw abitangaza.
Abandi bari muri ibi biganiro (…)

Umusirikare w’u Rwanda ubarizwa mu mutwe w’ingabo z’umuryango wa Afurika y’iburasirazuba uzwi nka EACRF, yitabiriye ibiganiro byahuze umutwe witwaje intwaro wa M23 n’ingabo za Repubulika ya Demukarasi ya Congo, FARDC.

Uyu musirikare wari wambaye impuzankano ya RDF iriho ikirango cya EACRF yari yaherekeje Komanda w’uyu mutwe, Lieutenant General Jeff Nyagah muri ibi biganiro byabereye mu gace ka Kibumba gahana imbibi nkuko amakuru dukesha Primo.rw abitangaza.

Abandi bari muri ibi biganiro barimo Colonel Nzenze Imani uyobora ibirindiro bya M23 biri muri Kibumba, Lieutenant General Tchiko Tshitambwe uyobora ibikorwa bya FARDC muri rusange na General Mashita uyobora ibikorwa bya FARDC mu ntara ya Kivu y’Amajyaruguru.

Mu mutekano usesuye wari urinzwe n’ingabo za Kenya zibarizwa muri EACRF, intumwa za M23 na FARDC zaganiriye ku imirwano yahagarara, uyu mutwe witwaje intwaro ugasubira mu birindiro wahozemo, hagakurikiraho ibiganiro bya politiki.

Uyu musirikare w’u Rwanda ari muri EACRF hashingiwe ku mwanzuro wafashwe n’abakuru b’ibihugu bya EAC, ushyirwa mu bikorwa n’abagaba bakuru b’ingabo.

Kuri uyu wa 13 Ukuboza 2022,Umutwe wa M23 washyize hanze itangazo rigaragaza ko wakiriye intumwa za FARDC, iz’umuryango wa EAC n’itsinda rishinzwe kugenzura umutekano wo ku mipaka mu karere k’ibiyaga bigari (EJVM), iz’urwego rushinzwe iperereza n’intumwa za misiyo ya Loni ifite inshingano zo kubungabunga amahoro mu RDC.

Lawrence Kanyuka, umuvugizi wa politiki wa M23 yasobanuye ko bakiriye izi ntumwa i Kibumba ku wa mbere tariki 12 Ukuboza 2022 kandi ngo bakagirana ibiganiro mu mahoro.

Itangazo rya M23 ntirisobanura ibyari bikubiye mu biganiro impande zombi zagiranye uretse gusa kugarukira ku kwemeza ko byabaye amahoro.

M23 ivuga ko itegereje n’ibindi biganiro bizabera mu gace ka Bwiza aho ivuga ko inzirakarengane zikomeje gukorerwa Jenoside.