Abayobozi b’ikipe ya AS Kigali bahagaritse kapiteni wayo Haruna Niyonzima na rutahizamu Sugira Ernest igihe cy’ibyumweru bibiri bazira kutaboneka mu myitozo y’iyi kipe nyuma yo kwandagazwa na Rutsiro FC muri shampiyona.
As Kigali yatsinzwe na Rutsiro FC ibitego 2-1 , ku mukino w’umunsi wa 12 wa Shampiyona wabaye mu mpera z’icyumweru gishize tariki ya 16 Mutarama 2022. AS Kigali yakoze imyitozo bukeye bwaho ku Cyumweru mu gitondo, buri mukinnyi utarayitabiriye akaba yarahawe ibihano.
Iyi (...)

Sponsored Ad

Abayobozi b’ikipe ya AS Kigali bahagaritse kapiteni wayo Haruna Niyonzima na rutahizamu Sugira Ernest igihe cy’ibyumweru bibiri bazira kutaboneka mu myitozo y’iyi kipe nyuma yo kwandagazwa na Rutsiro FC muri shampiyona.

As Kigali yatsinzwe na Rutsiro FC ibitego 2-1 , ku mukino w’umunsi wa 12 wa Shampiyona wabaye mu mpera z’icyumweru gishize tariki ya 16 Mutarama 2022. AS Kigali yakoze imyitozo bukeye bwaho ku Cyumweru mu gitondo, buri mukinnyi utarayitabiriye akaba yarahawe ibihano.

Iyi myitozo yabaye saa 8h, ntabwo yagaragayemo kapiteni w’iyi kipe, Haruna Niyonzima na rutahizamu Sugira Ernest.

Ntabwo umutoza Jimmy Mulisa n’ubuyobozi bw’iyi kipe bishimiye imyitwarire y’aba bakinnyi bakabaye babera urugero abandi, byanabaviriyemo gufatirwa ibihano, aho buri wese yahagaritswe ibyumweru bibiri muri iyi kipe.

Nyuma yo guhanwa, Sugira Ernest yafashe iya mbere asaba imbabazi avuga impamvu ze ndetse amakuru avuga asa n’uwamaze kubabarirwa, dore ko yanemerewe kuza gukora imyitozo, mu gihe Haruna we atigeze asaba imbabazi.

Bivuze ko uwahagaritswe azagaruka mu kibuga nyuma y’imikino ibanza ya shampiyona kuko izarangira tariki ya 28 Mutarama 2022.

AS Kigali iri kwitegura imikino ya shampiyona aho ku wa Gatatu izakina na Bugesera FC mu karere ka Bugesera, ikaba izakurikizaho APR FC tariki ya 22 Mutarama 2022 kuri Stade ya Kigali i Nyamirambo.

Nyuma y’umunsi wa 12 wa shampiyona y’u Rwanda, AS Kigali iri ku mwanya wa Kane n’amanota 20, ikaba irushwa amanota 5 na Kiyovu Sport iri ku mwanya wa mbere.