Umuhanzi Naseeb Abdul Juma wamamaye mu muziki w’isi nka Diamond Platnumz ari mu nzira zo kuzuza miliyari 2 (Miliyoni ibihumbi 2) zarebye ibihangano bye ku rubuga rwa YouTube.

Nkuko imibare ibigaragaza Diamond Platnumz mu mwaka umwe gusa kuva mu Ukwakira 2021 yungutse abantu barenga miliyoni 417 barebye ibihangano byose amaze gushyira ku muyoboro bwite (Channel) wa YouTube.

N’ukuvuga ko mu mwaka umwe wonyine Platnumz yavuye ku kurebwa na 1,536,976,308 B ubu akaba amaze kurebwa n’abagera kuri 1,954,714,891 B. Iyi mibare igaragaza ko ari we muhanzi wa mbere muri Afurika yo munsi ya Sahara umaze kurebwa n’abantu benshi kuri YouTube (Total Views).

Ushyize mu mibare Diamond Platnumz arabura miliyoni 45 zonyine kugira ngo yuzuze miliyari 2 z’abantu barebye ibihangano byose kuri YouTube ndetse ashimangira umwanya wa mbere mu bahanzi bakunzwe kuri uru rubuga ku mugabane w’Abirabura.

Imibare dukesha urubuga Social Blade igaragaza ko umuyoboro wa YouTube w’uyu muhanzi wunguka abarenga miliyoni 22 mu minsi 30 yonyine , ibi bivuze ko Diamond Platnumz ntagihindutse yasoza uyu mwaka wa 2022 yujuje miliyari 2 kuri YouTube.