Fatima Bosch wari uhagarariye Mexique yegukanye ikamba rya Miss Universe 2025, ni mu gihe Solange Tuyishime Keita, Umunyarwandakazi wa mbere witabiriye iri rushanwa yagarukiye muri 30 ba mbere.

Mu gitondo cyo kuri uyu wa 21 Ugushyingo 2025 nibwo hamenyekanye uwegukanye ikamba rya Miss Universe 2025.

Uyu mukobwa wegukanye ikamba rya Miss Universe, azahora yibukirwa ku buryo atihanganiye ibitutsi by’uwari Umuyobozi wungirije wa Miss Universe Thailand yakiriye iri rushanwa, wabanje kumwibasira ubwo bageraga muri iki gihugu bitegura guhatanira ikamba.

Ku wa 5 Ugushyingo 2025, uyu mukobwa wari uhagarariye Mexique ubwo yari kumwe n’abo bari bahatanye bose, mu gikorwa cyabanjirije irushanwa, Nawat Itsaragrisil wari umuyobozi wungirije wa Miss Universe Thailand yamwise ‘umuntu utagira ubwenge’.

Mu mashusho yashyizwe kuri Facebook, agaragaza Nawat Itsaragrisil abaza Miss Mexique ati: “Numvise ngo wanze gushyira ku mbuga nkoranyambaga zawe ibintu byose birebana na Thailand, n’ibikorwa byacu byose. Ni ukuri? Ntushaka gushyira ibintu byose ku mbuga nkoranyambaga kuko umuyobozi wawe wo muri Mexique yagutegetse kutabyitaho, no kutamamaza igihugu cyakiriye irushanwa? Niba ukurikiza amabwiriza y’umuyobozi w’igihugu cyawe, uri umuntu utagira ubwenge.”

Muri ayo mashusho Miss Mexique yumvikanaga avuga ko yaje guhagararira igihugu cye kandi ko niba abo bayobozi bafitanye ibibazo n’abamwohereje we bitamureba.

Mu gihe uyu muyobozi yahamagaraga abashinzwe umutekano ngo basohore uyu mukobwa, abandi bakobwa nabo bahise bahaguruka barasohoka bifatwa nk’imyigaragambyo yanagize ingaruka kuri uwo mugabo kuko yahise ahagarikwa.

Nyuma y’urugendo yatangiye nabi, Fatima Bosch byarangiye ariwe wegukanye ikamba, akurikirwa na Veena Praveenar Singh wari uhagarariye Thailand wabaye Igisonga cya mbere, Stephany Abasali wari uhagarariye Venezuela aba Igisonga cya kabiri, Ma Ahtisa Manalo wari uhagarariye Philippine we aba Igisonga cya gatatu, mu gihe Igisonga cya kane yabaye Olivia Yace wo muri Côte d’Ivoire.

Tuyishime Solange Keita wabaye Umunyarwandakazi wa mbere witabiriye iri rushanwa ntabwo yahiriwe no kuryegukana, icyakora yabashije kwinjira muri 30 ba mbere.

Tuyishime w’imyaka 42 y’amavuko yari aherutse gutangaza ko nubwo atabasha kwegukana iri rushanwa ntacyo byaba bimutwaye kuko yashoboye gukora ubukangurambaga bugaragaza ko imyaka ari imibare bityo agatinyura abagore kujya bitabira amarushanwa nk’aya y’ubwiza.

Mexique yisubije iri rushanwa yaherukaga mu 2020 ubwo ryari ryegukanywe na Andrea Meza. Umwaka ushize ryegukanywe na Victoria Kjær Theilvig wo muri Denmark.

Fatima Bosch wari uhagarariye Mexique yegukanye ikamba rya Miss Universe yahangayikiyemo

Veena Praveenar Singh wari uhagarariye Thailand yabaye Igisonga cya mbere

Stephany Abasali wari uhagarariye Venezuela yabaye Igisonga cya kabiri

Ma Ahtisa Manalo wari uhagarariye Philippine ni Igisonga cya gatatu

Igisonga cya kane ni Olivia Yace wo muri Côte d’Ivoire

Tuyishime Solange Keita, Umunyarwandakazi wa mbere witabiriye iri rushanwa ntabwo yahiriwe no kuryegukana, icyakora yabashije kwinjira muri 30 ba mbere