Umunyamideli Kantengwa Judith Heard umunyarwandakazi ukorera mu gihugu cya Uganda yegukanye igihembo cya Nyampinga mpuzamahanga wa Afurika w’Ibidukikije (Miss Environment Africa International), mu irushanwa ryaberaga mu Buhinde.

Sponsored Ad

Uyu munyamideri wari usanzwe ari Miss Environment International yagiye i Mumbai mu byumweru bibiri bishize, yitabiriye irushanwa ryari ririmo abakobwa batandukanye bavuye mu bihugu 36, aho insanganyamatsingo yagiraga iti ” ’Beauty starts with environmental care’.

Umuyobozi wa Bryan Morel Publications Muhumuza Brian uri kumwe na Kantengwa mu Buhinde yatangaje ko uyu munyamideli azagaruka muri Uganda mu cyumweru gitaha, agatangiza ubukangurambaga mu bijyanye no gukusanya imyanda ya pulasitiki, kuyitunganya no gutera ibiti ahantu hatandukanye mu gihugu.

Uyu kandi yegukanye ikamba, seritifika (certificate) na kontaro yo kwamamaza itaramenyakana ibiyikubiyemo yahawe n’Umuyobozi wa Miss environment International, Rushikesh Mirajkar.

Judith Heard ni Umunyarwandakazi uzwi mu kwerekana imideli, yubatse izina muri Uganda. Ni umubyeyi w’abana barimo umwe yafashe akiyemeza kumurera ndetse n’impanga yabyaranye n’umugabo we, Umunyamerika Dr. Alex Heard unamwongerera imbaraga mu bikorwa bye byo kumurika no guhanga imideli. Gusa baje gutandukana mu 2019 nyuma y’imyaka 13 babana.