Urubuga nkoranyambaga rwa Instagram rwamaze kugeza ku bantu miliyari eshatu (3,000,000,000) barukoresha buri kwezi, ibintu byerekana ubwiyongere buri hejuru uhereye mu mwaka wa 2018.

Umuyobozi mukuru wa Meta, Mark Zuckerberg, hamwe na Adam Mosseri uyobora Instagram, batangaje ko uku gukura kwihuse guterwa n’imyitwarire y’abakoresha uru rubuga cyane cyane mu gukoresha ubutumwa bugufi (Direct Messages), Reels ndetse na ’algorithme’ zibereka ibyifuzo bishya bibahuza n’ibyo bakunda.

Abinyujije ku muyoboro we wa Instagram, Zuckerberg yagize ati: “Ni umuryango udasanzwe twubatse hano.” Aya magambo yayatangaje ashima intambwe ikomeye uru rubuga rugezeho mu myaka micye ishize.

Kuva yashingwa mu 2010, Instagram yagiye izamuka ku muvuduko udasanzwe. Mu 2012, Facebook (ubu ni Meta) yayiguze ku mafaranga angana na miliyari imwe y’amadolari. Ubu ni kimwe mu bicuruzwa by’ingenzi bya Meta ku isoko ry’imbuga nkoranyambaga.

Meta yaherukaga gutangaza imibare y’abakoresha Instagram mu Ukwakira 2022, ubwo Zuckerberg yari yemeje ko abayikoresha buri kwezi barenze miliyari ebyiri. Nyuma yaho, mu kwezi kwa Mata 2024, Meta yatangaje ko itazongera kugaragaza buri gihembwe imibare y’abakoresha Facebook n’izindi porogaramu zayo, ahubwo igatangaza gusa imibare y’abakoresha buri munsi imvuga zose za Meta. Mu kwezi kwa Nyakanga 2025, uwo mubare wari ugeze kuri miliyari 3.48, urenga n’ibyari byitezwe n’abasesenguzi.

Kugera ku bantu barenga miliyari eshatu ku kwezi bitumye Instagram yinjira mu rwego rumwe na Facebook ndetse na WhatsApp, zose zigaragazwa nk’imbaraga zikomeye za Meta. Zuckerberg yari yatangaje muri Mutarama ko Facebook nayo ikoreshwa n’abarenga miliyari eshatu buri kwezi, mu gihe muri Mata 2025 nabwo yatangaje ko na WhatsApp nayo imaze kugera ku rwego rumwe.

Iyi ntambwe nshya yerekana neza ko Instagram ikomeje kuba rumwe mu mbuga nkoranyambaga zikunzwe cyane ku isi, by’umwihariko mu rubyiruko, ndetse ikaba ikomeje gufasha Meta guhatanira imbere mu isoko rikomeye na TikTok ndetse na YouTube.