Umunya-Nigeria, Jay-Jay Okocha n’Umufaransa Didier Domi, bombi bakiniye Ikipe ya Paris Saint-Germain, bageze mu Rwanda ku mugoroba wo kuri iki Cyumweru, tariki ya 6 Nyakanga 2025, binyuze mu bufatanye bwa Visit Rwanda n’iyi kipe yo mu Bufaransa.

Okocha w’imyaka 51, yakiniye Paris Saint-Germain hagati ya 1998 na 2002, ayitsinda ibitego 12 mu mikino 84.

Ni mu gihe Didier Arsène Marcel Domi w’imyaka 47, wari myugariro w’iburyo, yakiniye iyi kipe y’i Paris hagati ya 1996 na 1998 no hagati ya 2001 na 2004.

Okocha yageze ku Kibuga Mpuzamahanga cy’Indege cya Kigali saa Tatu n’iminota 20 ku mugoroba wo kuri iki Cyumweru, yambaye imyambaro y’Ikipe ya PSG, ahasanga Domi wari wahagaze mbere.

Biteganyijwe ko mu minsi bazamara mu Rwanda, kugeza ku wa 11 Nyakanga, aba banyabigwi bazasura ibice bitandukanye birimo n’ibyanya nyaburanga nka Pariki y’Ibirunga ndetse n’ingoro ndangamuco z’umuco n’amateka by’u Rwanda.

Mu 2019, ni bwo Urwego rw’Igihugu rushinzwe Ubukerarugendo (RDB) rwatangaje ko rwatangiye ubufatanye n’Ikipe ya Paris Saint-Germain yo mu Bufaransa, bugamije kureshya abashoramari no gukomeza kuba icyerekezo kibereye ubukerarugendo.

Ni ubufatanye bufasha abakurikirana PSG n’Isi muri rusange kumenya ubwiza bw’u Rwanda, umuco ndetse n’udushya twaruhangwamo kimwe n’ibicuruzwa bigezweho birukorerwamo, bya ’Made in Rwanda.’

Ibyo kandi byitezweho kureshya abashoramari bo mu Bufaransa no mu bindi bice by’Isi ku buryo babyaza umusaruro amahirwe aboneka mu Rwanda.

Binyuze mu bufatanye na Paris Saint Germain, abakinnyi b’iyi kipe n’ibindi byamamare mpuzamahanga, basura u Rwanda, bakabona ibyiza bitatse igihugu cy’imisozi igihumbi uhereye ku bijyanye n’ubugeni, umuco, siporo, muzika, ubukerarugendo n’ibindi.

Muri Mata uyu mwaka ni bwo amasezerano y’ubufatanye yari asanzwe hagati ya Visit Rwanda na Paris Saint-Germain yavuguruwe kugeza mu 2028, nyuma y’uko impande zombi zishimiye umusaruro wayo.

PSG yamamaza Visit Rwanda ku kibuga cyayo, Parc des Princes, ndetse ikambara imyambaro yanditseho Visit Rwanda mu gihe iri mu myitozo.

Mu Gikombe cy’Isi cy’Amakipe kiri kubera muri Leta Zunze Ubumwe za Amerika, PSG izahura na Real Madrid muri ½ ku wa Gatatu, yambara Visit Rwanda ku kuboko.

Jay-Jay Okocha asohoka mu Kibuga cy’Indege cya Kigali i Kanombe

Umunya-Nigeria Jay-Jay Okocha yaganiriye gato n’itangazamakuru mbere yo kuva ku kibuga cy’indege

Okocha na Domi bakinanye muri PSG, bagiye kumara iminsi itanu mu Rwanda

Didier Domi wabaye myugariro wa PSG, na we ari mu Rwanda