Pasiporo y’u Rwanda yaje ku mwanya wa 19 muri Afurika na 77 ku Isi muri pasiporo zikomeye, kuko uyifite yemerewe kwinjira mu bihugu 63 atatswe viza.
Byatangajwe mu rutonde The Henley Passport Index ruherutse gusohoka, rwerekana uko pasiporo z’ibihugu ku isi zirutanwa hashingiwe kuho ufite iyo pasiporo ashobora kujya atatswe viza cyangwa akayihabwa agezeyo.
Ku rutonde mpuzamahanga pasiporo y’u Rwanda iri ku mwanya wa 77, umwanya rusangiye na Mozambique.
Ugereranyije n’urutonde rwasohotse muri (...)

Sponsored Ad

Pasiporo y’u Rwanda yaje ku mwanya wa 19 muri Afurika na 77 ku Isi muri pasiporo zikomeye, kuko uyifite yemerewe kwinjira mu bihugu 63 atatswe viza.

Byatangajwe mu rutonde The Henley Passport Index ruherutse gusohoka, rwerekana uko pasiporo z’ibihugu ku isi zirutanwa hashingiwe kuho ufite iyo pasiporo ashobora kujya atatswe viza cyangwa akayihabwa agezeyo.

Ku rutonde mpuzamahanga pasiporo y’u Rwanda iri ku mwanya wa 77, umwanya rusangiye na Mozambique.

Ugereranyije n’urutonde rwasohotse muri Mutarama uyu mwaka, pasiporo y’u Rwanda yiyongereye mu gaciro kuko icyo gihe umunyarwanda yashoboraga kujya mu bihugu 61 nta viza, ubu bikaba byarabaye 63. Icyo gihe u Rwanda rwari ku mwanya wa 83 ku isi, n’uwa 20 muri Afurika.

Muri aya mezi arindwi ya 2023, ibihugu umunyarwanda yemerewe kujyamo nta viza byariyongereye aho hagiyemo igihugu nka Seychelles ndetse na Congo Brazaville.

Ku rutonde mpuzamahanga, ibihugu bitanu biza ku mwanya w’imbere mu kugira pasiporo ikomeye harimo Singapore aho uyifite yemerewe kujya mu bihugu 192 nta viza, ufite pasiporo y’u Budage, u Butaliyani na Espagne yemerewe kujya mu bihugu 190 nta Viza, mu gihe ufite pasiporo ya Autriche, Finland, u Bufaransa, u Buyapani, Luxembourg, Koreya y’Epfo na Suède yemerewe kujya mu bihugu 189 nta viza.

Ku mugabane wa Afurika, ibihugu biza imbere mu kugira pasiporo ikomeye habanza Afurika y’Epfo, aho iri ku mwanya wa 52 ku rutonde mpuzamahanga.

Umuturage wa Afurika y’Epfo, afite uburenganzira bwo kujya mu bihugu 106 ku isi nta viza abanje gusaba.

Botswana ni iya kabiri muri Afurika aho ufite pasiporo yayo yemerewe kujya mu bihugu 89 nta viza, Namibia ufite pasiporo yayo ajya mu bihugu 80, Lesotho uyifite ajya mu bihugu 79, eSwatini uyifite ajya mu bihugu 77.

Muri Afurika y’Iburasirazuba, pasiporo ya Kenya niyo iza ku mwanya wa mbere mu gukomera kuko uyifite ajya mu bihugu 76 nta viza, ufite iya Tanzania yemerewe kujya mu bihugu 73 nta viza, ufite iya Uganda ajya mu bihugu 69, nta viza, ufite pasiporo y’u Rwanda ajya mu bihugu 63 nta viza mu gihe ufite pasiporo y’u Burundi ajya mu bihugu 51 nta viza, uwa Sudani y’Epfo ajya mu bihugu 46, naho uwa Repubulika Iharanira Demokarasi ya Congo ajya mu bihugu 45 nta viza.

Ku rutonde mpuzamahanga Afghanistan niyo iza ku mwanya wa nyuma aho ufite pasiporo yayo ajya mu bihugu 27 nta viza.