Ikipe ya Manchester United yatangaje ko yirukanye Rúben Amorim wari Umutoza Mukuru wayo kubera umusaruro muke iyi kipe yari imaranye igihe muri Shampiyona y’u Bwongereza.

Kuri uyu wa Mbere, tariki ya 5 Mutarama 2026, ni bwo abayobozi ba Manchester United barimo Omar Berrada na Jason Wilcox bakoze inama igaruka ku hazaza h’uyu mutoza bikaba byarangiye yirukanywe.

Iyi kipe yatangaje ko Darren Fletcher ari we usigarana ikipe by’agateganyo mu gihe irimo gushaka umutoza mushya.

Uyu Munya-Portugal w’imyaka 40 yari amaze amezi 14 muri izi nshingano, aho yayifashije iyi kipe kugera ku mukino wa nyuma wa UEFA Europa League itsindwa na Tottenhma Hottspurs igitego 1-0.

Amorim asize iyi kipe iri ku mwanya wa gatandatu n’amanota 31, iri kwitegura Burnley mu mukino w’Umunsi wa 21 wa Premier League uzaba ku wa gatatu, tariki ya 7 Mutarama 2026.

Darren Fletcher ni we wahawe gutoza Manchester United by’agateganyo