Abahataniye ibi bihembo batangiye kugaragazwa guhera tariki 16 Nyakanga 2025, ndetse amatora yo kuri Internet yatangiye tariki 10 Kanama 2025, azasozwa tariki 2 Nzeri 2025. Ni mu gihe, ibihembo bizatangwa ku mugaragaro tariki 5 Nzeri 2025.

Ni ubwa mbere u Rwanda ruhagararirwa n’umubare munini w’ibyamamare mu byiciro bitandukanye. Abahanzi, abakinnyi ba filime, abatunganya amashusho ndetse n’abanyamideli b’Abanyarwanda, bose bagaragaye mu byiciro bitandukanye birimo ibi bikurikira.

Massamba Intore ahataniye igihembo mu cyiciro cy’umunyabigwi mu muziki ‘Best MVAA Legend Icon Award of the Year 2025’. The Ben (Mugisha Benjamin) ahataniye igihembo mu cyiciro cya Best MVAA Artist of the Year 2025.

Alliah Cool ahataniye igihembo mu cyiciro cya Best MVAA Humanitarian of the Year 2025. Israel Mbonyi ahataniye igihembo mu cyiciro cya Best MVAA Gospel Artist of the Year 2025. Director Gad uzwi cyane mu gutunganya amashusho y’indirimbo, ahataniye igihembo mu cyiciro cya Best MVAA Music Director of the Year 2025.

Element Eleeh, umwe mu ba producer bakomeye mu Rwanda, ahataniye igihembo mu cyiciro cya Best MVAA Music Producer of the Year 2025.

Gratien Niyitegeka (Papa Sava) umunyarwenya ukunzwe cyane, ahataniye igihembo mu cyiciro cya Best MVAA Content Creator of the Year 2025.

Dr Nsabi, umukinnyi wa filime wamenyekanye cyane muri Cinema, ahataniye igihembo mu cyiciro cya Best MVAA Actor of the Year 2025.

Nadia, wamamaye nka Muganga muri filime “Umuturanyi”, ahataniye igihembo mu cyiciro cya Best MVAA Breakout Actress of the Year 2025. Aime Gad, umukinnyi wa filime uri kuzamuka, ahataniye igihembo mu cyiciro cya Best MVAA Breakout Actor of the Year 2025.

Ruti Joel ahataniye igihembo mu cyiciro cya Best MVAA Indigenous Artist of the Year 2025. Ugeziwe Ernesto, ubarizwa muri Leta Zunze Ubumwe za Amerika, ahataniye igihembo mu cyiciro cya Best MVAA Young Male Achiever of the Year 2025.

Laura Sarah, wegukanye ikamba muri Rwanda Global Diversity 2025, ahataniye igihembo mu cyiciro cya Best MVAA Model of the Year 2025. Igihozo Nshuti ahataniye igihembo mu cyiciro cya Best MVAA Content Creator of the Year 2025.

Uretse Abanyarwanda, ibi bihembo kandi byitabiriwe n’ibyamamare ku rwego rw’Afurika no ku rwego mpuzamahanga barimo: Fally Ipupa (Congo DR), Wizkid (Nigeria), Juma Jux (Tanzania), Frank Ro (Nigeria), Meddy Saleh (Rwanda) n’abandi.

Hari kandi abandi banyamuryango bazwi mu ruganda rw’imyidagaduro barimo Kamatari Sandra (influencer), Divine Uwa (umubyinnyi) ndetse n’umukinnyi wa filime Jojo Wajoxy uhataniye mu cyiciro cya Best MVAA Actress of the Year 2025.

Music Video Africa Awards (MVAA) ni ibihembo ngarukamwaka bigamije gushimira no guha agaciro abahanzi, abatunganya amashusho, abakinnyi ba filime n’abandi bafite uruhare mu guteza imbere imyidagaduro ifite ireme muri Afurika.

Ibi ni bimwe mu bihembo bikomeye ku uruhando ruhuza ibyamamare bitandukanye byo ku mugabane, bikaba binatanga amahirwe yo kwagura ibikorwa mpuzamahanga no kongera agaciro ku ndangagaciro za Afurika binyuze mu muziki, filime n’imbuga nkoranyambaga.

Kuba Abanyarwanda bagaragaye mu byiciro byinshi ni ikimenyetso cy’uko imyidagaduro y’u Rwanda iri kugera ku rwego rwo guhangana ku mugabane no hanze yawo.

Amatora ari gukorerwa kuri uru rubuga: https://mvaa.yaaawards.com/votenow kuva ku ya 10 Kanama 2025 kugeza ku ya 2 Nzeri 2025.

The Ben ahataniye igihembo cya Best MVAA Artist of the Year 2025 – Iki ni igihembo gihabwa umuhanzi wagaragaje ubuhanga buhambaye mu muziki mu mwaka wose, agakurura imitima y’abafana ku rwego rw’akarere n’isi yose

Alliah Cool ahataniye igihembo cya Best MVAA Humanitarian of the Year 2025; gihabwa umuntu wagize uruhare rukomeye mu bikorwa by’ubugiraneza n’imibereho myiza y’abaturage

Massamba Intore ahataniye igihembo cya Best MVAA Legend Icon Award of the Year 2025; gihabwa umuhanzi w’inararibonye wagize uruhare rukomeye mu guteza imbere umuziki n’umuco kandi agashyira igihugu cye ku rwego mpuzamahanga

Israel Mbonyi ahataniye igihembo cya Best MVAA Gospel Artist of the Year 2025 . Iki ni igihembo gihabwa umuhanzi w’indirimbo z’itorero cyangwa zo kuramya no guhimbaza Imana wagaragaje ubuhanga n’uruhare mu gukundisha abantu Imana binyuze mu muziki

Element Eleeh ahataniye igihembo cya Best MVAA Music Producer of the Year 2025; gihabwa umuntu w’umuhanga mu gutunganya no gukora indirimbo, akazishyira ku rwego rwo hejuru mu ireme n’ubuhanga

Dr Nsabi ahataniye igihembo cya Best MVAA Actor of the Year 2025. Iki ni igihembo gihabwa umukinnyi wagaragaje ubuhanga buhambaye mu gukina filime, akurura abakunzi b’imyidagaduro n’abafana

Wizkid ahataniye igihembo cya Best MVAA Artist of the Year 2025, gihabwa umuhanzi wagaragaje ubuhanga buhebuje mu muziki, akagera ku bafana benshi ku rwego rw’isi, anashimangira umuziki wa Afurika ku rwego mpuzamahanga