Korali Baraka yo mu Itorero ADEPR Nyarugenge yateguye igitaramo cyihariye cyiswe ‘Ibisingizo Live Concert’, kigamije guhindura abantu abigishwa ba Yesu no gushimira Imana ku bikomeye yakoze.

Iki gitaramo kizabera kuri ADEPR Nyarugenge ku wa 4-5 Ukwakira 2025, nk’uko byatangajwe n’ubuyobozi bwa korali mu kiganiro n’abanyamakuru cyabaye ku wa 30 Nzeri 2025.

Korali Baraka yatangijwe mu 1982, igizwe n’abantu b’ingeri zose, ikaba ifite abaririmbyi barenga 120. Uretse kuririmba, iyi korali ikora n’ibindi bikorwa birimo n’iby’ubugiraneza.

Perezida wa Korali, Muhayimana Jean Damascene, yasobanuye ko intego nyamukuru y’iki gitaramo ari uko abanyabyaha bakizwa bakamenya Umwami Yesu. Yagize ati: “Ntago dushimishwa no kubona bakuru bacu, bashiki bacu ndetse n’ababyeyi bacu babayeho nabi, kuko abantu batarakira Yesu mu buzima bwabo, akenshi usanga ubuzima bwabo buri mu kaga kubera ibyaha.”

Yongeyeho ko iyi gahunda ishingiye ku ijambo ry’Imana riboneka muri 2 Timoteyo 2:19 agira ati: “Nyamara urufatiro rukomeye rw’Imana ruracyahagaze, rwanditsweho iki kimenyetso ngo ‘Uwiteka azi abe,’ kandi ngo ‘Umuntu wese uvuga izina ry’Uwiteka ave mu bidatunganye.’”
Akomoza ku dushya twitezwe muri iki gitaramo, Muhayimana yavuze ko abazakitabira bazumva indirimbo nshya batigeze bumva, kandi buri wese akazataha abonye Yesu.

Muri iki gitaramo kandi hateganijwe igikorwa cyo kwishyurira abantu 300 ubwisungane bwo kwivuza (mituweli), hagamijwe gufasha abatishoboye kubona serivisi z’ubuzima.

Korali Iriba (ADEPR Taba), Korali Besalel (ADEPR Murambi), Gatenga Worship Team hamwe na The Light Worship Team (CEP ULK) bazafatanya na Korali Baraka muri iki gitaramo, bikazaba ari n’amahirwe yo kumva indirimbo nshya, guhembuka no kwakira ubutumwa bwubaka.

Ibyo kurya by’umwuka, bizagaburwa n’abajozi b’Imana basanzwe bazwi mu itorero barimo Rev. Dr. Past Antoine Rutayisire, Past Mugabo Windekwe na Rev. Pastor Valentin Rurangwa.

Umuyobozi wa Korali Baraka yasoje asaba abantu bose kuzaza kwifatanya na bo muri iki gitaramo, avuga ko abazitabira bazaryoherwa n’indirimbo nziza ndetse n’ijambo ry’Imana rizabageza ku guhinduka no gukomeza ukwizera.

Korali Baraka yateguje igitaramo gikomeye ihamagarira abantu kuzaza kwifatanya na bo gusingiza Imana