Abakinnyi babiri b’umupira w’amaguru hamwe n’umusore ukina umukino wa Ski biciwe muri Ukraine mu gitero bagabweho n’ingabo z’Uburusiya

Abakinnyi bishwe nta mbabazi n’ingabo za Putin, mu gihe umubare w’abapfuye muri iki gihugu ukomeje kwiyongera.

Umukinnyi wakiniraga amakipe y’abato hamwe mu cyiciro cya kabiri mu ikipe ya Karpaty Lviv witwa Vitalii Sapylo w’imyaka 21, yishwe n’Abarusiya mu ntambara ikaze yabereye Kyiv.

Yinjiye mu gisirikare nk’urasisha igifaru kugira ngo arengere igihugu cye mu gitero cy’abasirikare ba Putin.

Dmytro Martynenko ufite imyaka 25,wakiniraga ikipe y’abatarabigize umwuga ya FC Gostomel yo mu karere avukamo, yapfanye na mama we ubwo inzu yabo yari hafi y’umurwa mukuru yarashweho ibisasu.

Abakinnyi b’umupira w’amaguru bavuze ko aribo bantu bo muri siporo bishwe bwa mbere muri iyi ntambara.

Bwana Sapylo yashimiwe nk ’intwari" n’ikipe ye yashenguwe umutima no kumva ko yatakaje ubuzima bwe arwana n’ingabo z’Uburusiya ku wa gatanu.

Itangazo ry’ikipe ryagize riti: "Tuzahora twibuka iteka ryose iyi ntwari."

Ihuriro mpuzamahanga ry’umupira wamaguru FIFPRO ryunamiye aba bombi mu magambo yemeza ko bapfuye.

Ryagize riti: "Ibitekerezo byacu biri kumwe n’imiryango, inshuti ndetse n’abakinnyi bagenzi bab’abasore bakinaga umupira w’amaguru muri Ukraine, Vitalii Sapylo na Dmytro Martynenko, abakinnyi ba ruhago ba mbere baguye mu ntambara.

Bombi baruhukire mu mahoro."

Umukinnyi watangaga icyizere mu mukino wo kunyerera ku rubura,Ski, Yevhen Malyshev na we yiciwe ku rugamba agerageza guhagarika igitero cy’Abarusiya.

Uyu musore w’imyaka 20, wari mu ikipe y’abato y’igihugu cye, yahagaritse uyu mukino by’agateganyo imyaka ibiri kugira ngo ajye mu gisirikare.

Federasiyo ya Biathlon yo muri Ukraine yemeje ko yababajwe n’urupfu rwe.

Yagize iti: "Turahumuriza cyane igihugu, inshuti n’umuryango.Tuzahora twibuka iteka Yevhen Malyshev."

Isi ya siporo yahungabanijwe n’urupfu rw’aba bakinnyi bari bakiri bato.