Abakinnyi bo muri Shampiyona y’u Bwongereza, Premier League, bagira uruhare mu kugena ibiva mu mikino nk’uko byatangajwe n’umupolisi w’Umunya-Suède, Fredrik Gardare, wayoboye itsinda rishinzwe kurwanya ibyaha bibera mu mikino.

Fredrik Gardare yabivumbuye ubwo yari mu isaka ryakozwe kuri ‘Casino’ itemewe, aho hagaragaye ibimenyetso bitandukanye.

Gardare arazwi cyane kuko yigeze kuyobora iperereza ryamaze amezi 18 ryagaragaje ko Dickson Etuhu wigeze gukinira Manchester City yagize uruhare mu kugena uko imikino itandukanye irangira muri Suède.

Kuri ubu, uyu mupolisi yavuze ko hari abakinnyi bo muri Premier League barenze umwe, byagaragaye ko bagira uruhare mu kugena uko imikino irangira, amakarita y’umuhondo atangwa, koruneri ziboneka n’ibindi bitandukanye.

Yongeyeho ko aya makuru yayahaye Ishyirahamwe ry’Umupira w’Amaguru muri Suède, ariko atazi neza niba ryarayagejeje ku Ishyirahamwe rya Ruhago mu Bwongereza (FA).

Fredrik Gardare yavuze ko mu iperereza ryakozwe mu 2021, ubwo bafatiraga abantu muri ‘casino’ itemewe, telefoni nyinshi bafatanywe zasatswe, imwe muri zo ikagaragaramo ubutumwa bwinshi bwa Telegram bugaragaza uburyo abakinnyi benshi bagiye bagira uruhare mu kugena uko imikino myinshi y’i Burayi n’indi mpuzamahanga irangira.

Nubwo hari ibimenyetso bikomeye, polisi yo muri Suède yafashe icyemezo cyo kudakomeza iperereza, ariko Gardare yavuze ko iyo telefone ikiri mu bubiko bwa polisi.

Ishyirahamwe ry’Umupira muri Suède ryemeje ko ryakiriye amakuru mu buryo bwa rusange, ariko nta bisobanuro birambuye ryahawe.

Premier League yo yatangaje ko nta makuru ifite kuri iki kibazo, kuko ibyerekeye kugenzura ibi biri mu nshingano z’Ishyirahamwe ry’Umupira w’Amaguru mu Bwongereza.

Mu mwaka ushize, byavuzwe ko nibura abakinnyi batanu bo muri Premier League bagerageje kwegerwa n’abagena uko imikino irangira, nk’uko byatangajwe na Moses Swaibu wahoze ari umukinnyi kandi akaba yarigeze gufungwa kubera ruswa.

Abakinnyi bo muri Premier League bashinjwe kugena ibiva mu mikino

Fredrik Gardare (ibumoso) yavuze ko benshi mu bakinnyi bo muri Premier League bagena ibiva mu mikino

Mu 2020, Dickson Etuhu yahagaritswe imyaka itanu muri ruhago ya Suède nyuma yo guhamwa n’icyaha cyo kugena ibiva mu mikino