Imikino y’amajonjora y’ibanze y’Imikino Nyafurika ya CAF Champions League na CAF Confederation Cup iri kugana ku musozo, aho abakinnyi batatu b’Abanyarwanda bari mu makipe yamaze kubona itike yo kuzakina amatsinda.

Aba bakinnyi ni Mugisha Bonheur, umunyezamu Ntwari Fiacre na myugariro Buregeya Prince, bose bageze mu matsinda CAF Confederation Cup.

Al Masry yo mu Misiri ya Mugisha yabigezeho nyuma yo gusezerera Al-Ittihad yo muri Libya, ku giteranyo cy’ibitego 2-1 mu mikino yombi.

Kaizer Chiefs yo muri Afurika y’Epfo ikinamo Ntwari Fiacre yabonye itike isezereye AS Simba yo muri Repubulika Iharanira Demokarasi ya Congo ku giteranyo cy’ibitego 3-1 mu mikino yombi.

Nairobi United yo muri Kenya ikinamo myugariro Buregeya Prince yasezereye Esperance Sportif du Sahel kuri penaliti 6-5 nyuma yo kunganya ibitego 2-2 mu mikino yombi.

Iyi kipe iri mu zatunguranye bikomeye kuko yazamutse mu Cyiciro cya Mbere muri uyu mwaka w’imikino nyuma yo kwegukana Igikombe cy’Igihugu itsinze Gor Mahia ku mukino wa nyuma.

Abandi banyarwanda bahanzwe amaso muri CAF Champions League aribo Bizimana Djihad na myugariro Manzi Thierry bakinira Al Ahly Tripoli yanganyije na RS Berkane igitego 1-1 mu mukino ubanza.

Uwo kwishyura uteganyijwe tariki ya 1 Ugushyingo 2025 muri Maroc.

Muri rusange amakipe amaze kugera mu matsinda ya CAF Champions League ni Mamelodi Sundowns, Simba SC, St Éloi Lupopo, MC Alger, Stade Malien, AS FAR, Power Dynamos, Al Ahly, Young Africans, Rivers United, Al Hilal Omdurman, JS Kabylie, Esperance de Tunis na Petro de Luanda.

Ni mu gihe muri CAF Confederation Cup amakipe yose yageze mu matsinda yamaze kumenyekana ariyo Zamalek, USM Alger, Wydad, CR Belouizdad, Kaizer Chiefs, Stellenbosch, Azam FC, Singida Black Stars, ZESCO United, Maniema Union, San Pedro, OC Safi, Nairobi United, AS Otoho, Djoliba AC na Al Masry.

Buregeya Prince ni umwe mu bageze mu matsinda y’Imikino Nyafurika

Mugisha Bonheur ni umwe mu bagenderwaho muri AL Masry

Umunyezamu Ntwari Fiacre ni umwe mu banyarwanda bake bazakina amatsinda y’Imikino Nyafurika