APR FC ihagarariye u Rwanda mu irushanwa rya CECAFA Kagame Cup 2025, yatangiye neza itsinda Bumamuru FC yo mu Burundi ibitego 2-0.

Uyu mukino wa mbere wo mu Itsinda B, wabereye kuri Isamuhyo Stadium isanzwe ari iy’Ikipe ya KMC FC i Dar es Salaam muri Tanzania.

Umutoza wa APR FC, Abderrahim Taleb, yari yahisemo gukoresha Ruhamyankiko Yvan mu izamu, imbere ye hari Niyigena Clément na Nshimiyimana Yunussu mu gihe Byiringiro Gilbert yakinaga iburyo naho Bugingo Hakim agakina ibumoso.

Dauda Yussif, Ruboneka Bosco na Memel Dao bakinaga hagati, impande ziriho Hakim Kiwanuka na Djibril Ouattara mu gihe imbere hari William Togui.

Ikipe y’Ingabo z’Igihugu yibonye mu mukino hashize iminota ine ibanza, yabyaje umusaruro ikosa ryakorewe kuri Memel Dao ku munota wa munani, Bugingo Hakim arihannye, umupira usanga Djibril Ouattara wegeye imbere awutanga umunyezamu wa Bumamuru FC, Ndayishimiye Azadie, awuboneza mu izamu.

APR FC yashoboraga kubona penaliti ubwo William Togui yagwaga mu rubuga rw’amahina mu minota yakurikiyeho, umusifuzi agaragaza ko nta kosa ryabayeho.

Uyu rutahizamu wo muri Côte d’Ivoire wabonye amahirwe menshi ariko ntayabyaze umusaruro, yacomekewe umupira mwiza ku munota wa 23, acenga umunyezamu ariko myugariro akaba na Kapiteni wa Bumamuru FC arahagoboka, awushyira muri koruneri.

Uyu mukino wakiniwe ku izuba ryinshi, dore ko watangiye saa Sita z’amanywa, wagoye cyane APR FC mu gice cya kabiri, ariko ntibyayibujije kubona igitego cya kabiri ku munota wa 74 ubwo Memel Dao yinjiranaga umupira ku murongo, awuhinduye mu izamu usanga William Togui wawutanze umunyezamu akawuboneza mu nshundura.

APR FC yahise ikora impinduka eshatu; William Togui, Hakim Kiwanuka na Memel Dao basimburwa na Ngabonziza Pacifique, Lamine Bah na Niyibizi Ramadhan.

Izindi mpinduka ebyiri zakozwe ku munota wa 86 ubwo Iraguha Hadji na Aliou Souané basimburaga Djibril Ouattara na Dauda Yussif Seidu.

Raouf Memel Dao ni we watowe nk’umukinnyi mwiza w’uyu mukino, ahabwa ibihumbi 500 by’Amashilingi ya Tanzania (agera ku bihumbi 290 Frw).

APR FC yagiye muri CECAFA idafite abakinnyi umunani bahamagawe mu makipe y’ibihugu, izakina umukino wa kabiri wo mu Itsinda B ku wa Gatandatu, aho izahura na Mlandege FC yo muri Zanzibar.

Abakinnyi 11 babanje mu kibuga ku ruhande rwa APR FC

Abakinnyi ba Bumamuru FC babanje mu kibuga

Djibril Ouattara yishimira igitego cya mbere cya APR FC cyabonetse hakiri kare

APR FC yatangiye neza muri CECAFA Kagame Cup yari yagarukiye ku mukino wa nyuma mu 2024

Ruboneka Bosco ni we wari Kapiteni wa APR FC idafite abakinnyi umunani bagiye mu makipe y’ibihugu

William Togui yabonye uburyo bwinshi ariko ntiyabubyaza umusaruro

Memel Dao yabaye umukinnyi w’umukino