Nk’uko bitangazwa n’ibinyamakuru byo mu Bwongereza, impande zombi zamaze kugera ku masezerano y’amagambo (verbal agreement), aho Sporting yemeye ubusabe bwa nyuma bwa Arsenal bungana na Miliyoni €63.5 miliyoni hakiyongeraho €10 y’inyongera. Biravugwa kandi ko agent w’uyu mukinnyi yemeye kugabanya amafaranga ye y’inyungu kugira ngo igikorwa kigende neza.

Gyökeres yari umwe mu bakinnyi bifuzwaga cyane ku mugabane w’u Burayi, ndetse yari rutahizamu wifuzwaga cyane na Arsenal mu myaka ibiri ishize. Uyu mukinnyi watsinze ibitego 54 mu mikino 52 yakiniye Sporting mu mwaka ushize w’imikino, ni we wabonywe nk’ukwiye kuziba icyuho Arsenal yari ifite imbere.

Arsenal yari imaze igihe kinini idakoresha rutahizamu wa No. 9 kubera imvune za Kai Havertz na Gabriel Jesus, ibintu byagize ingaruka ku musaruro w’ikipe. Yarangije ku mwanya wa kabiri muri Premier League ku nshuro ya gatatu yikurikiranya, umwaka ushize w’imikino yasoje shampiyona irushwa amanota 10 na Liverpool yegukanye igikombe.

Gyökeres ubwe ngo yari yihisemo Arsenal nk’ikipe yifuza, ndetse ntiyigeze yita ku zindi kipe zamushakaga ku isoko ry’igura n’igurisha.