Liverpool yatsinze Marseille ibitego 3-0, Bayern Munich itsinda Union Saint Gilloise ibitego 2-0 zombi zibona itike ya ⅛ cya UEFA Champions League, mu mikino yabaye mu ijoro ryo ku wa Gatatu, tariki ya 22 Mutarama 2026.

Umukino wa Liverpool na Marseille watangiye iyi kipe yo mu Bwongereza isatira abarimo Hugo Ekitike na Alexis Macallister na Mohamed Salah bagerageza uburyo bw’ibitego ariko ntibukunde.

Ku munota wa 23, Ekitike yatsinze igitego cya mbere ariko umusifuzi avuga ko yaraririye.

Ku munota wa mbere w’inyongera ku gice cya mbere, Dominik Szoboszlai yafunguye amazamu ku gitego yatsinze kuri ‘coup franc’ nziza yateye anyujije umupira munsi y’amaguru y’abakinnyi ba Marseille.

Igice cya mbere cyarangiye Liverpool yatsinze Olympique Marseille igitego 1-0.

Iyi kipe yo mu Bufaransa yajyanye imbaraga mu gice cya kabiri abarimo Mason Greenwood bagerageza uburyo bw’ibitego ariko ab’inyuma ba Liverpool bakabyitwaramo neza.

The Cops yabonye igitego cya kabiri ku munota wa 73, aho Jeremie Frimpong yazamukanye umupira neza awuhinduye imbere y’izamu, umunyezamu wa Marseille Gerónimo Rulli akitsinda.

Mu minota 80, Marseille yasatiriye cyane ariko Greenwood na Pierre Emerick Aubameyang bagahusha ibitego.

Ku munota wa 90+3, Ryan Gravenberch yazamukanye umupira mu kibuga hagati yihuta awucomekera Cody Gakpo atsinda igitego cya gatatu.

Umukino warangiye Liverpool yatsinze Marseille ibitego 3-0 yizera kuzakomeza muri ⅛.

Indi mikino yabaye, Bayern Munich yatsinze Union Sainy Gilloise ibitego 2-0 bya Harry Kane, isanga Arsenal muri ⅛.

FC Barcelona yatsinze Slavia Praha ibitego 4-2 ijya ku mwanya wa cyenda n’amanota 13, aho igomba gutsinda umukino wa nyuma izakina na FC Copenhagen ngo ikomeze muri ⅛.

Chelsea yatsinze Pafos igitego 1-0, Athletic Club itsinda Atalanta ibitego 3-2, Juventus yatsinze Benfica ibitego 2-0, Newcastle United itsinda PSV Eindoven ibitego 3-0, Qarabag FK yatsinze Frankfurt ibitego 3-2, mu gihe Galatasaray yanganyije na Atletico Madrid igitego 1-1.

Kugeza ubu Arsenal na Bayern Munich ni yo makipe yageze muri ⅛, mu gihe andi ari mu mwanya mwiza wo ukomeza ari Real Madrid, Liverpool, Tottenham, PSG, Newcastle United na Chelsea.

Dominik Szoboszlai yishimira igitego cya mbere yatsinze

Gakpo na Gravenberch bishimira intsinzi

Ibitego bibiri bya Harry Kane byafashije Bayern Munich kugera muri 1/8

Juventus yatsinze Benfica ibitego 2-0

Moisés Caicedo yafashije Chelsea kwitwara neza

FC Barcelona yitwaye neza itegereza umunsi wa nyuma

Anthony Gordon yafashije Newcastle kwitwara neza itsinda PSV