Ancelotti yarangije manda ye ya kabiri atoza Real Madrid mu mpera z’umwaka ushize ahita ajya gutoza Brazil. Uyu mugabo w’imyaka 66 watoje amakipe arimo Chelsea, Everton, PSG na Real Madrid, yashinjwaga ko atishyuye imisoro ingana na miliyoni 1 z’amayero ku mushahara yahawe ubwo yatozaga Real Madrid bwa mbere hagati ya 2013 na 2015.

Nubwo atazafungwa, Ancelotti yasabwe kwishyura ihazabu ingana na miliyoni 333 z’amapawundi. Amategeko ya Espagne ateganya ko umuntu uhamijwe icyaha kitarimo urugomo kandi nta yindi myitwarire mibi ya mbere afite, adakunze koherezwa muri gereza iyo igihano cyatanzwe kitarengeje amezi 24.

Muri uyu mwaka, Ancelotti yari yavugiye mu rukiko ati: "Sinigeze ntekereza gukora uburiganya na rimwe.” Yavuze ko Real Madrid yamuhaye umushahara usukuye wa miliyoni 6 z’amayero (angana na miliyoni 5.1 z’amapawundi), hanyuma ibigendanye n’uburyo imisoro yishyurwa abiharira abamufasha mu by’imari. Yagize ati: “Numvaga ari ibisanzwe kuko icyo gihe abakinnyi bose n’umutoza wambanjirije babigenzaga gutyo.”

Si ubwa mbere abatoza cyangwa abakinnyi bakomeye bo muri Espagne bagaragaye mu bibazo nk’ibi. Lionel Messi yakatiwe gufungwa amezi 21 mu 2017 ariko bihindurwamo ihazabu y’amayero 252,000, ntiyajyanwa muri gereza.

Cristiano Ronaldo yemeye kwishyura ihazabu ya miliyoni 18.8 z’amayero mu 2019. Jose Mourinho, nawe wahoze atoza Real Madrid, yaciwe ihazabu ya miliyoni 2.2 z’amayero kubera ikibazo nk’iki ubwo yatozaga Real Madrid mu 2011-2012.