RDC yasezerewe ku Cyumweru nyuma yo gutsindwa na Maroc ibitego 3-1, ntiyarenga amatsinda y’iri rushanwa riri kubera muri Kenya, Uganda na Tanzania.

Nyuma y’uko yari ifite amasaha 48 kugira ngo ibe yatanze hoteli nk’uko amategeko y’Impuzamashyirahamwe y’Umupira w’Amaguru muri Afurika (CAF) abiteganya, itsinda ry’abakinnyi n’abatoza rya Repubulika Iharanira Demokarasi ya Congo ryakomeje kubura uko riva i Nairobi.

Konti zitandukanye zo ku mbuga nkoranyambaga zirimo ’Joueurs Congolais’ ku rubuga rwa X, zatangaje ko abagize Ikipe ya RDC batazi niba bazabona uko bava mu Burasirazuba bwa Afurika.
Ubusanzwe, amakipe yasezerewe aba agomba guhita ataha. Gusa kuri RDC si ko bimeze kuko nta ndege yateganyijwe igomba gucyura abakinnyi n’abatoza ngo basubire i Kinshasa.

Amakuru avuga ko nyuma y’uko nta matike y’indege yaguzwe, kuri ubu iyi kipe itegereje ko hari indege izoherezwa na leta akaba ari yo iyikura muri Kenya.

Ishyirahamwe ry’Umupira w’Amaguru muri RDC (FECOFA) ntacyo riratangaza ku cyatumye ikipe y’iki gihugu itinda gusubira mu rugo.

Ikipe ya RDC yabuze uko iva muri Kenya

RDC yasezerewe muri CHAN 2025 itarenze amatsinda