Rutahizamu w’ikipe y’igihugu ya Portugal na Al Nassr yo muri Arabia Saudite, Cristiano Ronaldo yabaye umukinnyi wa mbere w’umupira w’amaguru utunze arenga Miliyari y’Amapawundi.

Urubuga rwa Bloomberg rureba abantu bakize cyane ku isi rukurikije imitungo yabo rwarebye ubutunzi bwa Cristiano Ronaldo w’imyaka 40 rusanga yanditse amateka.

Uru rubuga rwakoze ubugenzuzi ku mafaranga uyu mukinnyi yinjiza n’ibyo yashoyemo, rusanga afite agera kuri Miliyari 1.04 y’Amapawundi aho ari we mukinnyi wa mbere w’umupira w’amaguru ubigezeho.

Bloomberg yavuze ko uyu mukinnyi yinjije Miliyoni 410 z’Amapawundi hagati ya 2002 na 2023 avuye mu mushahara. Rwerekanye ko kandi hari amafarnga yagiye ava mu kwamamaza inganda zirimo Nike.

Uru rubuga rwanerekanye ko kuva muri 2022 agiye muri Al Nassr ari we mukinnyi wahembwe amafaranga menshi mu mupira w’amaguru aho buri mwaka yishyuwe Miliyoni 177 z’Amapawundi.

Rwerekanye kandi ko nyuma yo kongera amasezerano muri iyi kipe yo muri Arabia Saudite mu myaka ibiri iri imbere azinjiza arenga Miliyoni 298 z’Amapawundi.

Ku mwanya wa kabiri mu bakinnyi batunze agatubutse haza Lionel Messi aho we afite Miliyoni 620 z’Amapawundi naho Neymar we akaza ku mwanya wa gatatu na Miliyoni 280.

Cristiano Ronaldo yabaye umukinnyi wa mbere w’umupira w’amaguru utunze arenga Miliyari y’Amapawundi