Ikipe ya Portugal yakatishije itike ya 1/8 cy’irangiza ndetse izanayobora itsinda,nyuma yo gutsinda Turkey ibitego 3-0 mu mukino wa kabiri wo mu itsinda F rya Euro 2024.

Sponsored Ad

Muri uyu mukino wabereye ku kibuga cya Dortmund,Portugal yari yakinnye nabi umukino wa mbere na Czechia ndetse ikawutsinda ibitego 2-1 bigoranye,yagarutse yariye karungu ndetse itsinda hakiri kare kandi inakina neza.

Umukinnyi wa Manchester City, Bernardo Silva niwe wafunguye amazamu ku ruhande rwa Portugal,ku munota wa 31 w’umukino nyuma y’umupira wari uhinduwe na Nuno Mendes.

Bidatinze ku munota wa 28,myugariro Samet Akaydin yasubije umupira inyuma umunyezamu we Bayindir yavuye mu izamu,yitsinda igitego cyakuye igihugu cye mu mukino hakiri kare.

Igice cya mbere cyarangiye Portugal iyoboye n’ibitego 2-0 ndetse iri hejuru mu mikinire.

Mu gice cya kabiri,ku munota wa 55,Bruno Fernandes yatsinze igitego cya gatatu ku mupira yahawe na Cristiano Ronaldo,nyuma y’uko bacitse ubwugarizi bwa Turkey bagasigarana n’umunyezamu ari babiri.

Portugal izakina kuwa Gatatu w’icyumweru gitaha na Georgia mu mukino wa nyuma wo mu itsinda uzaba ntacyo wayitwara.Ku rundi ruhande,Turkey izaba ifite akazi gakomeye ko gushaka itike ku kabi n’akeza kuko izahura na Czech Republic yo yanganyije na Georgia igitego 1-1 uyu munsi.Izatsinda muri zombi izakomeza.

Umutoza Martinez wa Portugal yabwiye abanyamakuru ko kuwa gatatu azaha amahirwe abakinnyi batarakina kugira ngo bigaragaze ndetse banashake imyanya yo gukina mu mikino yo gukuranamo.

Cristiano Ronaldo yahaye umupira Bruno Fernandes wavuyemo igitego,uba umupira 8 atanze uvuyemo igitego muri Euro.Ni agahigo kuko nta wundi urabikora.

Portugal imaze kubona intsinzi mu mikino 11 baheruka mu gihe Bernardo Silva yatsinzemo igitego.

Mu wundi mukino wabaye kuri uyu wa Gatandatu,Ububiligi bwari bwatsinzwe igitego 1-0 na Slovakia mu mukino ubanza,bwisubiyeho butsinda Romania ibitego 2-0 ndetse bunahusha ibindi byinshi.

Ababiligi baje bashaka gutsinda byanze bikunze,bafunguye amazamu ku munota wa 2 ku gitego cyatsinzwe na Youri Tielmans ku ishoti rikomeye yateye rijya mu izamu.

Nyuma yo guhusha ibitego byinshi ahanini bitewe n’umunyezamu wa Romania,Ububiligi bwatsinze igitego cya kabiri ku munota wa 80 gitsinzwe na Kevin de Bruyne.

Lukaku watsinze ibitego 2 bakabyanga ku mukino wabanje,n’uyu munsi yatsinze ikindi bavuga ko yaraririye.Ibitego bye bitatu byanzwe biruta ubwinshi ibya rutahizamu ufite byinshi mu irushanwa.Abafite byinshi ni bibiri.

Ububiligi burasabwa gutsinda umukino wa nyuma na Ukraine kugira ngo bukomeza mu cyiciro gikurikiyeho.Iyi Ukraine yatsinze Slovakia ibitego 2-1 bivuze ko amakipe yose muri iri tsinda E afite amanota 3.Umunsi wa nyuma bizaba bikomeye.