Umunya-Brésil, Fábio Deivson Lopes Maciel wamamaye nka “Fábio”, yakuyeho agahigo kari gafitwe n’Umwongereza Peter Shilton nk’umukinnyi wakinnye imikino myinshi ku Isi mu mupira w’amaguru w’abagabo.

Uyu munyezamu usanzwe ukinira Ikipe ya Fluminense yabigezeho ku wa Kabiri nyuma yo gukina umukino wa 1391.

Ku wa Gatandatu, Fábio w’imyaka 44 yari yageze ku gahigo k’uwahoze ari umunyezamu w’u Bwongereza, Peter Shilton.

Nyuma y’iminsi ine, yagaragaye mu mukino Fluminense yatsinzemo América de Cali yo muri Colombia ibitego 2-0 kuri Stade ya Maracana, aba umunyezamu ukinnye imikino myinshi ku Isi.

Fábio yatwaye Copa Libertadores ari kumwe na Fluminense mu 2023 ndetse yari mu ikipe yatsinzwe na Chelsea muri ½ cy’Igikombe cy’Isi cy’Amakipe giheruka kubera muri Leta Zunze Ubumwe za Amerika.

Uyu munyezamu yakinnye imikino 976 muri Cruzeiro hagari ya 2005 na 2022, nyuma yo gukina imikino 30 muri Uniao Bandeirante n’indi 150 muri Vasco da Gama.

Umukino yakoreyemo amateka bakina na América de Cali wari uwa 235 akinira Fluminense.

Fábio yatangiye urugendo rwe rwa ruhago mu 1997, umwaka Shilton yasezereyemo. Uyu Mwongereza we avuga ko yakinnye imikino 1387 ariko “Guinness des Records” igaragaza 1390.

Umunya-Portugal, Cristiano Ronaldo, ni we mukinnyi wa gatatu umaze gukina imikino myinshi ku Isi aho kuri ubu amaze kugaragara mu 1283 mu makipe ya Sporting

Lisbon, Manchester United, Real Madrid, Juventus na Al Nassr arimo uyu munsi.
Fábio Deivson Lopes Maciel wamamaye nka “Fábio” yabaye umukinnyi wakinnye imikino myinshi ku Isi mu mupira w’amaguru

Fábio yashimiwe ku mikino 1391 amaze gukina