Mu 2022 ni bwo FC Barcelone yagiranye amasezerano n’urubuga rwa Spotify, impande zombi zemeranya ko iyi kipe izajya yambara ikirango cyayo ku myambaro yayo yo ku kibuga no mu myitozo. Uru rubuga na rwo rukayigenera miliyoni 76,3$ n’izindi nyongera ku buryo zigera kuri 82,2$.

Si aya mafaranga uru rubuga rwishyura yonyine kuko rwongeraho na miliyoni 5,8$ yo kwitirirwa ikibuga cya FC Barcelone kiri kuvugururwa cya ‘Spotify Camp Nou’.

Mu myaka ine impande zombi zari zumvikanye iraburaho umwe ikarangira. Ni igihe cyiza ku mpande zombi cyo kuba zakwicara zikagirana andi masezerano avuguruye, ibyo FC Barcelone yifuza cyane.

FC Barcelone isanga mu myaka itatu ishize hari kinini yafashije Spotify, ikabishingira ku bakinnyi bayo bitwaye neza mu myaka ibiri iheruka. Abo barimo Lamine Yamal, Pedri, Raphinha n’abandi.

Kubera abakinnyi bayo bitwaye neza bakegukana n’amwe mu marushanwa akomeye yiganjemo ay’imbere mu gihugu, isanga umwambaro wayo warongereye agaciro ukarenga miliyoni 140$.

Ikindi kandi iyi kipe yifuza ni uko izina rya stade yayo na ryo ryakongererwa agaciro, dore ko mu myaka ine iri imbere izaba yaramaze kuvugururwa.

Ibitangazamakuru byo muri Espagne byatangaje ko mu gihe Spotify yaba itifuza kongera amasezerano akageza mu 2030 cyangwa kugera mu 2034, iyi kipe yakingurira amarembo ibindi bigo byifuza kuyegera ikabyamamariza.

FC Barcelone yifuza kongera amasezerano kugira ngo ikomeze guhangana no kuva mu bibazo by’ubukungu bitayoroheye kuva mu mwaka w’imikino wa 2017/18.

FC Barcelone isanga abakinnyi bayo bongereye agaciro k’amafaranga Spotify igomba kwishyura