Ishyirahamwe ry’Umupira w’Amaguru muri Gabon ryatangaje ko ingamba zari zafatiwe Ikipe y’Igihugu n’abakinnyi barimo Pierre-Emerick Aubameyang nyuma yo gusezererwa kare mu Gikombe cya Afurika, zakuweho.

Muri iri rushanwa riri kubera muri Maroc, Gabon yatsinzwe imikino yose yo mu Itsinda F rya CAN 2025 yahuyemo na Cameroun, Mozambique na Côte d’Ivoire.

Ibi byatumye Minisitiri wa Siporo, Paul Ulrich Kessany, atangariza kuri televiziyo ko ikipe y’iki gihugu ihagaritswe ndetse ari na cyo cyemezo cyafashwe kuri Kapiteni wayo, Pierre-Emerick Aubameyang na myugariro Bruno Ecuele Manga.

Kuri ubu Ishyirahamwe rya Ruhago muri Gabon ryatangaje ko icyo cyemezo cyakuweho kuko byari gutuma iki gihugu gihagarikwa na FIFA kubera kuvanga poltiki mu ifatwa ry’ibyemezo bireba umupira w’amaguru.

Itangazo ryashyizwe hanze ku wa Mbere rigira riti “Ingamba zari zafashwe na guverinoma zo guhagarika ikipe y’igihugu zakuweho, ndetse ni ko bimeze ku byo kwirukana abakinnyi Pierre-Emerick Aubameyang na Bruno Ecuele Manga nyuma y’umusaruro udakwiye Ikipe y’Igihugu yabonye mu Gikombe cya Afurika.”

Ishyirahamwe rya Ruhago muri Gabon ryongeye ko ubu ikibaraje ishinga ari imyiteguro y’Igikombe cya Afurika cya 2027 kizabera muri Tanzania, Uganda na Kenya.

Ikipe y’Igihugu ya Gabon yari yahagaritswe yakomorewe na guverinoma y’iki gihugu