Ikipe y’igihugu ya Portugal yahaye icyubahiro uwari umukinnyi wayo, Diogo Jota n’umuvandimwe we bitabye Imana bazize impanuka y’imodoka aho hari n’uwashyizeho ‘Tattoo’ ye.

Muri Nyakanga uyu mwaka ni bwo Diogo Jota wakiniraga Portugal na Liverpool n’umuvandimwe we Andre, bitabye Imana bazize impanuka y’imodoka bakoreye muri Espagne. Kuva icyo gihe ni bwo ikipe y’igihugu yakiniraga yongeye guhurira hamwe aho yitegura imikino yo gushaka itike y’igikombe cy’Isi cya 2026.

Mbere y’uko batangira kwitegura iyi mikino, babanje gufata umwanya wo kwibuka no guha icyubahiro Diogo Jota n’umuvandimwe we. Mu bari bari muri uyu muhango harimo abakinnyi b’iyi kipe y’igihugu barangajwe imbere na Cristiano Ronaldo, abo mu muryango w’uyu mukinnyi witabye Imana, ubuyobozi bw’ishyirahamwe ry’umupira w’amaguru muri Portugal na Minisitiri w’Intebe wa Portugal.

Ruben Neves wari inshuti na Diogo Jota cyane we yashyizeho ‘Tattoo’ ye mu rwego rwo gukomeza kumuha icyubahiro ndetse yahawe kuzajya anambara nimero yambaraga mu ikipe y’igihugu ya 21. Umukino wa nyuma uyu mukinnyi yakiniye Portugal ni uwo batwariyeho igikombe cya UEFA Nations League batsinze Espagne ku mukini wa nyuma.

Iyi kipe y’igihugu izajya mu kibuga ikina na Armenia ku wa Gatandatu mu mikino yo gushaka itike y’igikombe cy’Isi cya 2026.

Ruben Nuves yashyizeho Tatoo ya Diogo Jota mu rwego rwo kumuha icyubahiro

Cristiano Ronaldo mu muhango wo guha icyubahiro Diogo Jota