Ku wa gatatu, tariki ya 23 Ugushyingo, Herve Renard, yakoze ikintu kidasanzwe, ayobora Arabiya Sawudite, ikipe iri ku mwanya wa 51 ku isi itsinda Argentine ibitego 2-1 mu mukino wo mu itsinda C mu gikombe cy’isi cya 2022.
Uyu mutoza yavuze ko Argentina yazanye ishyaka rike kuko yari yasuzuguye Saudi Arabia bituma babatsinda.
Gutsinda Argentine ibitego 2-1 kuri Stade ya Lusail mu majyaruguru ya Doha ntabwo ari bibi kuri Renard utoza ikipe idahabwa amahirwe na benshi. Umuntu wese yashobora (…)

Ku wa gatatu, tariki ya 23 Ugushyingo, Herve Renard, yakoze ikintu kidasanzwe, ayobora Arabiya Sawudite, ikipe iri ku mwanya wa 51 ku isi itsinda Argentine ibitego 2-1 mu mukino wo mu itsinda C mu gikombe cy’isi cya 2022.

Uyu mutoza yavuze ko Argentina yazanye ishyaka rike kuko yari yasuzuguye Saudi Arabia bituma babatsinda.

Gutsinda Argentine ibitego 2-1 kuri Stade ya Lusail mu majyaruguru ya Doha ntabwo ari bibi kuri Renard utoza ikipe idahabwa amahirwe na benshi. Umuntu wese yashobora guhamya ubuhanga bw’uyu Mufaransa.

Nk’umuntu wifuza kugera kure, Renard yahise yihutira gukura igitutu ku ikipe ye nyuma yo gutsinda Argentine.

Icyakora mu kiganiro n’abanyamakuru yahshuye ibanga yakoresheje.

Ati"Inyenyeri zose zo mu kirere zari ku ruhande rwacu, ariko ntitwibagirwe ko Argentine ikiri ikipe nziza. Uyu ni umupira w’amaguru, rimwe na rimwe ibintu by’ubusazi bishobora kuba rwose."

"Rimwe na rimwe,hari igihe ikipe muhanganye iba idafite akanyabugabo. Ni ibisanzwe; natwe bitubaho iyo dukina n’amakipe yo hasi. Abantu bamwe ntibabyumva, ariko ushobora gutekereza ko gukina na Arabiya Sawudite,ishyaka ritaba rimeze no kimwe no gukina na Brazil. "

Ku wa gatandatu, tariki ya 26 Ugushyingo, Saudi izahura na Polonye, ​​kandi gutsinda kuri bo bizabaha itike yo mu kindi cyiciro na mbere y’umukino wabo wa nyuma na Mexico.

Imyitwarire myiza ya Arabiya Sawudite mu mateka y’igikombe cyisi yaherukaga muri Amerika mu 1994 aho bageze mu cyiciro cya 1/16.

Hamwe na Renard ubatoza, bashobora kurenga amateka ya 1994.

Abakurikiranye umupira wamaguru muri afurika byibuze mu myaka icumi ishize, ibikorwa by’uyu Mufaransa ntabwo byabatungura.

Yakomeje gutera imbere uko umwaka utashye kuva yiyemeza gukurikira inzira ye yo gutoza nyuma yo guherekeza umuyobozi we Claude Le Roy muri Ghana aho yabaye umwungirije ndetse akaba n’ushinzwe kongerera ingufu Black Stars mu 2008.

Renard yavukiye mu mujyi wa Aix-les-Bains mu Bufaransa ku ya 30 Nzeri 1964, yakiniye amakipe atatu yo mu cyiciro cyo hasi mu gihugu cye avukamo nka myugariro mbere yo kumanika inkweto mu 1998 kugira ngo akurikirane ubutoza.

Yahereye muri shampiyona yo hasi y’Ubufaransa, yimukira muri Ghana ubwo Claude Le Roy yafataga Black Stars. Yakoze nk’umutoza wongera ingufu n’umwe mu bungirije mu gihe cya AFCON 2008.

Nyuma yuko Le Roy yirukanwe na Ghana kubera kunanirwa gutwara AFCON ya 2008, Renard yaciye inzira ye kandi byamubereye byiza cyane.

Yabanje gutoza Zambiya mu mpera za 2008 hanyuma afata Angola aho yageze mu cyiciro cya kabiri ubwo bakiraga AFCON 2010.

Yagarutse muri Zambiya mu 2011 nyuma yo gutsindwa muri USM Algiers.Kugaruka kwe muri Zambiya ku nshuro ya kabiri byatumye akora amateka mu mupira w’amaguru w’iki gihugu.

Yabafashije gutwara AFCON 2012 muri Gabon na Equatorial Guinea aho batsinze Cote D’Ivoire kuri penariti ku mukino wa nyuma. Nyuma y’imyaka itatu, yafashije Cote d’Ivoire gutsinda Ghana kuri penariti 9-8 kugirango itware igikombe cya kabiri cya AFCON.

Renard yanditse amateka kuko yabaye umwe mu batoza bake b’abanyamahanga batwaye AFCON ndetse akaba ari nawe wenyine wabikoranye n’ibihugu bibiri bitandukanye.

Yasubiye mu gihugu cye kavukire cy’Ubufaransa aho yatoje muri Ligue 1,Lille mu mwaka umwe gusa. Nyuma y’uko amasezerano ye na Lille arangiye, yagizwe umutoza wa Maroc mu 2016 maze abafasha kujya mu gikombe cy’isi cya 2018 cyabereye mu Burusiya.