Ibitego bitatu bya Danny Usengimana byahesheje Police FC amanita atatu
Rutahizamu wa Police FC, Danny Usengimana yatsinze yihariye ibitego bitatu ikipe ya Police FC yatsinze ikipe ya Musanze FC, mu mukino wa shampiyona.
Ku munota wa 6’ w’umukino watangiye FC Musanze itaribona nibwo Usengimana Danny yafunguye amazamu. Umukino wakomeje mu buryo Musanze FC yari ifite ubwumvikane bucye muri ba myugariro babashije kurangiza iminota 39’ y’igice cya mbere batinjijwe ikindi gitego.
Nyuma y’iminota (...)

Sponsored Ad

Ibitego bitatu bya Danny Usengimana byahesheje Police FC amanita atatu

Rutahizamu wa Police FC, Danny Usengimana yatsinze yihariye ibitego bitatu ikipe ya Police FC yatsinze ikipe ya Musanze FC, mu mukino wa shampiyona.

Ku munota wa 6’ w’umukino watangiye FC Musanze itaribona nibwo Usengimana Danny yafunguye amazamu. Umukino wakomeje mu buryo Musanze FC yari ifite ubwumvikane bucye muri ba myugariro babashije kurangiza iminota 39’ y’igice cya mbere batinjijwe ikindi gitego.

Nyuma y’iminota itanu igice cya kabiri gitangiye (50’), Usengimana Danny yongeye kurunguruka mu izamu rya FC Musanze ryari ririnzwe na Rwabugiri Omar wahoze muri APR FC.

Ku munota wa 60’ w’umukino nibwo usengimana Danny yashyizemo agashinguracumu atsinda igitego cya gatatu cya Police FC cyanabaye igitego cye cya gatatu mu mukino (Hat-trick). Uyu musore w’imyaka 21 yahise agwiza ibitego bitandatu (6) bituma ayobora urutonde rw’abamaze gutsinda ibitego byinshi muri shampiyona igeze ku munsi wayo wa gatandatu.

Igitego cy’impozamarira cya FC Musanze cyatsinzwe na Wayi Yeka wahise agira ibitego bibiri (2) muri shampiyona. Musanze FC kuri ubu iri ku mwanya wa 10 n’amanota umunani (8).

Police FC yahise ifata umwanya wa kabiri ku rutonde rw’agateganyo rwa shampiyona kuko kuri ubu ifite amanota 13 n’ibitego bitanu (5) izigamye inyuma ya Rayon Sports iri ku mwanya wa mbere n’amanota 16 ku bitego bine (4) izigamye.

Mu yindi mikino yabaye kuri iki Cyumweru ikipe ya Etincelles FC yatsinze Sunrise FC igitego 1-0 cyatsinzwe na Kambale Salita Gentil. Kiyovu Sport iheruka kunganya 0-0 na FC Musanze, yongeye kunganya na Kirehe FC 0-0 mu mukino waberaga i Nyakarambi ugatangira mu buryo abakunzi ba Kiyovu Sport batishimiye.

Amakuru Inyarwanda ifite gihamya nuko ikipe ya Kiyovu Sport yakinnye itambaye imyenda y’ikipe kuko binjiye mu kibuga bambaye imyenda y’abana batoragura imipira (Ball-Boys-Kits) nyuma yaho abasifuzi bavuze ko iyi kipe y’i Nyamirambo yitwaje imyambaro irimo umweru mwinshi mu gihe Kirehe FC nayo yambara imyenda irimo umweru n’umutuku.

Bamwe mu bayobozi ba Kiyovu Sport bavuga ko batumva neza ukuntu abasifuzi banze imyenda yabo mu gihe bandikishije muri FERWAFA ko igihe basuye andi makipe bazajya bambara imyenda yiganjemo umweru n’ibara ry’icyatsi ndetse bakavuga ko mu gihe abandi bavugaga ko ntacyo byari bitwaye kuba bakina kuko Kirehe FC ifite amabara y’umutuku atatuma abakinnyi bayoberana.

Dore uko umunsi wa Gatandatu wa shampiyona warangiye:

Kuwa Kane tariki 24 Ugushingo 2016:

*AS Kigali 1-0 Gicumbi FC

Ku Cyumeru tariki 27 Ugushyingo 2016:

*FC Musanze 1-3 Police FC

*Kirehe FC 0-0 Kiyovu Sport

*Etincelles FC 1-0 Sunrise FC

Kuwa Gatandatu tariki 26 Ugushyingo 2016

*Rayon Sports 1-0 Bugesera FC

*Espoir FC 2-0 Mukura VS

*FC Marines 0 -1 Amagaju FC

*Pepiniere FC vs APR FC (Ruyenzi, 15h30’/Ntiwabaye)

Src: Inyarwanda.com