Nyuma y’ibyumweru bibiri, imikino ya UEFA Champions League irasubukurwa kuri uyu wa Kabiri, tariki 29 Mata 2025 hakinwa iya ½.

Sponsored Ad

Muri iri joro harakinwa imikino ibanza, aho Arsenal FC yo mu Bwongereza iza kwakira Paris Saint-Germain yo mu Bufaransa mu mukino ubera kuri Emirates Stadium.

Uyu uzakurikirwa n’uteganyijwe ku wa Gatatu, tariki ya 30 Mata 2025, aho FC Barcelona yo muri Espagne izakira Inter Milan yo mu Butaliyani kuri Estadi Olímpic Lluís Companys yo mu mujyi wa Barcelona.

Umukino wa Arsenal na PSG ni wo mukino utegerejwe kurenza indi yose kuko aya makipe nta n’imwe irabasha guterura igikombe cy’iri rushanwa.

By’umwihariko, uyu mukino ufite kinini uvuze ku Rwanda n’Abanyarwanda dore ko amakipe yombi ari abafatanyabikorwa barwo aho yamamaza ubukerarugendo bw’u Rwanda.

Arsenal ntiragera ku mukino wa nyuma kuva mu 2006. Gusa kugera aha ikuyemo Real Madrid ku giteranyo cy’ibitego 5-1, ni icyizere gifatika.

Birashoboka ko iyi kipe yo mu Bwongereza yakuraho amateka mabi imaranye imyaka hafi 20, kuko iyo urebye mu mikino itanu yayihuje na PSG yatsinzemo itatu, inganya ibiri.

Zombi zaherukaga guhura mu Ukwakira 2024, icyo gihe Arsenal yatsinze PSG ibitego 2-0, inashyiraho agahigo ko kumara imikino 11 idatsindwa.

PSG irasabwa imbaraga muri uyu mukino kuko iza guhura na Arsenal itarinjizwa igitego na kimwe mu mikino 11 iheruka ya UEFA Champions League yabreye iwayo.

Amakipe yombi araza kuba afite intwaro zayo zishoboka. Kuri Arsenal hari rutahizamu Bukayo Saka uri kwitwara neza, PSG ikagira Ousmane Dembélé.

Arsenal irakina idafite Thomas Partey kubera amakarita y’umuhondo mu gihe Riccardo Calafiori atitozanyije n’abandi kubera imvune, bityo na we akaba adahari kuri uyu mugoroba.

Abakinnyi bashobora kubanza mu kibuga ku ruhande rw’iyi kipe yo mu Bwongereza ni: Raya; Timber, Saliba, Kiwior, Lewis-Skelly; Odegaard, Rice, Merino; Saka, Trossard na Martinelli.

Ni mu gihe PSG ishobora gukinisha Donnarumma; Mendes, Pacho, Marquinhos, Hakimi; Ruiz, Vitinha, Neves; Doué, Dembélé na Kvaratskhelia.

FC Barcelone vs Inter Milan

Umukino uzahuza FC Barcelone na Inter Milan ku wa Gatatu, si uwo kurenzwa ingohe kuko amakipe yombi ari mu bihe byiza bigana ku mukino wa nyuma.

FC Barcelone izakina uyu mukino iri mu mwuka mwiza kuko iherutse gutsinda Real Madrid ikegukana Igikombe cya Copa del Rey cya 32.

Si bibi iramutse yongeyeho na UEFA Champions League, nyuma yo gusezerera Inter Milan bimaze guhura inshuro 16 mu mateka.

Muri izo nshuro zose, Inter Milan yatsinze imikino itatu, itsindwa umunani, indi itanu ziranganya.

Uyu ni umwaka mwiza kuri FC Barcelone, kuko muri UEFA Champions League amakipe yayisuye akenshi yayatsindaga ibitego biri hejuru ya bitatu. Iyayikumiriye ni Atalanta yo mu Butaliyani zikanganya ibitego 2-2.

Inter yatsindiye mu Budage ibitego 2-1, biyifasha kugera muri ½ kuko umukino ukurikiyeho zanganyije ibitgo 2-2.

Nyuma y’icyo gihe Inter yatakaje imikino itatu irimo uwa Bologna na AS Roma muri Serie A, ndetse inasezererwa na AC Milan muri ½ cya Coppa Italia.

Gusa ibi na bwo bikuraho ko Inter Milan itaratsindwa mu mikino itandatu iheruka ya UEFA Champions League. Uyu mwaka kandi yagize imikino umunani ya UEFA Champions League itinjijwemo igitego.